Nemam rada nedelju, gda se časi sceđaju,
Gda se sence vlečeju i v pređu zapredaju.
Nemam rada kuhinju gdi se zdele rendaju;
Vrele peči i zapečke, gdi mačkori predeju.

Nedelja je hurmasta, nedelja je glumasta,
Gda ti kruli po čerevu, gda na čelu rog ti zrasta.
Misel jena čisto luda po možđani gda ti svrdla,
Po ladici miš se šeče i papere žute škrgla.

Nedelja je sa brez teka, kak je zelje divlje;
Gdi je težak, gdi su plugi, da po hiži krš razrivlje?
Gdi je stari kum Benkina, kiseliša da posrkne,
Sused Čop da golovratki hitro vrat zafrkne?

Po škatulki piska stoji; popi dendereču.
Z cicaljinom črevo bravlje mangupi razvleču…
Nigdi mira ni spokoja, nit’ gušta vun ziti:
Gdi su bolši običaji, ljudi plemeniti?

Pondelek na vrata luplje: nedelja f kraj ide!
Zgužvana je i znucana- nikaj ž nje ne pride!
Nemam volje za nju čuti, dam ju za tri groša:
V Pekel neg ju vezda nosi hudič-trhonoša!

Božica Jelušić