BESIDA O OCU

1.

Otac bi hodi ponosan i stasit
Cilu godinu u bandu s mazgon;
Pa vino istače, pretače, gušta…
Kad svojtu časti feton sira i pršuta
Glas mu procvita u lišće i cviće
Čak i kad ništo mrmja kroz justa…

Hoti bi znat od kojeg su koraja
Drugi hodili na brod a otac u lozu.
Incorda bi se i na brzinu prikrsti
Dok u portigu pored svetog Ante
Krene za poslon freškega jutra.

Hoti bi znat zašto u kraju usahne zemja
Zašto vrane doliću s istoka prin pozebi…
Hoti bi znat zašto s bande zaštekuća kos
A s druge se glase vrana i vela grmuša,
Zašto triba večeron zašćakunat portun
Dok leže misi puni vina na fižulu u dvoru.

Hoti bi znat kad triba fermat svoju rabotu
I zaprtit brime i vezat ga na lûke tovarru,
Jerbo čovik je inpio u svojoj viri i fatigi;
Gradi meje i navuca zemju, šušanj nanosi,
A što mu je potriba uvik donosi na sebi.

2.

Zasidne otac eto i popije iz buraće
Da malo libera tilo i pofuma španjulet
Od svog tabaka ča je u karti iz libreta
Žutog ka cekin onog galantara iz Splita

Tako na tabak navonja dvor sve do korte

A u bandi od juga, dok trapi za lozu,
Uvik oganj gori i čini bijice od pruća.
Otac svijen ka rogač ponekad zakanta
Sam sebi za družbu i onako kuntenat
Ispije svoje bevande od lanjskega vina

Dići će meje i vrgnut tamo novu lozu
Na onu bandu na suncu di najlipše rodi
Di nima prošpere – a kad mu prikudija
Da bi dikad zabeštima i svece i Boga
Ne hoti reć ništa jerbo se čovik stiska

Kad sve pristigne do dovnjih meja duše
I trud ferma ruke i glas diventa inkargan
Ni čoviku da otvori bajul od svojega srca
Da juti daž života po njemu pjušći naozbilj
Kako bi se s njin jidi oli se s njin lipo saluta

Otac uvik veli da je govor gruba danguba

3.

Otac bi zakanta iz lipog bilocvita duše
Ne bi li ga prošla nevoja i svaki senj slabosti
Oli čega grubog ča donosi jugo oli bura,
Jerbo se uvik vraća na svoju mrkentu
I gleda kroz oganj srca svoj prigršć jada…

Bojiš se Boga kad zalampa u povečerje
Da ti duša ne gre u prigatorij primo reda
Od vele muke u svakom škipu lipoga grozja.

U bandi težak klepeće motikon za veseje…

Mrkoće more galebu kako će razabrati pute,
A kamen osluškiva što loza i maslina govoru,
Oli to zemja kanta oli vitar koji doliće s mora.

Na prisoju je zenula loza i prolistala smokva.

4.

Projde grubo vrime pa se gleda iskosa
Koja nas misal mori kad se put oduji
Kad pasaju se ove meje i brazde i bande,
Kad se nima judi od rabote moliti Boga,
Koji i kad ne govori zna ti puno reći…

Vrime poskakiva s kamena na kamen!
Ki se remuća za njin mirita svoje postole,
Sluša gragor itića u gori oli šušur česvine.
Vrime ima kortu na volat i listo ju otvara
U neki laz sela s kampanelon koji se uzviri
Poput stare mazge kad joj skalaš oglavu.

Ne moreš se kuntreštat s vrimenon ni Bogon
Kad zavonja freški kruh poza mire od kuća…

Otac lipo sve gleda s ograda i lako zakanta.

5.

Čovik zaboravi kvarat što je učar govori.

Riči fermaju na nekoj čistini prostritoj u naman,
Mada svon snagon iz petnih žila zaprte na srce
I uz nas gredu tišćac ko da nas drže za ruku.

Triba nadvisit volat od neba i poći svojon štradon,
Ćapat rogatega za rog i činit vrimenu za dešpet,
Ka da nosiš talijanske postole iz furešte butige.

Ne tribaš nikomen prodati kroj od svoje jakete.

Otac nikad ne zahajika na svoju sriću oli nesriću,
Činija se ka kokot prid barufu na srid svoga dvora,
Morebit se cili svit zarda na njega a njenu sve ćaro…

Ne išće otac juroviku ni brnistru da sakrije mizeriju,
Ne parićaje obid od kaštradine za lotare iz vela mista.

A kada ga je ćapala neka morsa dreto oko srca
Ni mu triba ni fuž ni bokun ohvisti ni kočul života.

6.

Otac bi uvik reka; ne broji nikom žmule!

Nikad nevroz ne čini tratamenat svojoj lozi,
Stoj joj uvik infiso i slušaj ju atento ka Boga,
Prohmućaj svaku rič o njoj pred trpezom
Indivinaj joj naum i vazmi joj listo cilu dušu.

Škrte su hridi i već izlokana je mrkenta,
U žmul vino samo teče iz karatila u konobi…

Ne čini fintu, ne vodi abada od ičije intrige.

U škipu života je apena jutro počelo svićat,
Žvelto skoči oganj u suhar staroga laza,
Po kripnijoj zemji posrid ograda lozu sadi,
U kraj zabadaj smokve, mindele i masline…

Kantaj za se u nevoji, u tuzi, oli kad si vesel,
Jerbo veliki judi su od malo riči i ne odaju tajne.

7.

Gledan oca i hoti san poći spored njega
Kad ide tako u goru fatigat prin zore,
Di je diventa muško poza sunca i žege
Di si je nagradi potleušicu uz meju,
Pokrivenu pločaman na jednu vodu.

Prvo mraka ferma i skala se niz ograde,
Jerbo u proćulić prikopaje po cili dan Božji.
– Dojde drugi stajun i oko loze drugi posli!
Cile godine rabotaš a ne znaš hoće li intrade,
A cilu bandu znaš – svaku lozu si tamo posadi,
Provaj s njom mrvu ćakulat jer ona te pozniva…

Podbrađen crvenin obrujcen kanta u vitar,
A iza tega jopet muk bez riči uža toliko reći.

Kad gre za mazgon oli pred kućon sidi
Hoti bi znat što misli a niman koraja zapitat.

Otac siče goru, vadi gire i kamenje, trapi,
Gradi meje i skale, za neku novu ogradu.

8.
Zagledan oca kad je došlo vrime obidu,
Sidne na malo suhari i počme jist iz lonca.

Poslin obida uzdahne i napije se iz buraće
Zatim mu je gušt učinit španjulet i zafumat.
Uvik tako, ko da se moli dragomen Bogu,
Prvo otvori tabakeru i navonja se na tabak.

Gledan ga i gledan njegove ograde u bandi,
On ne kaže ništa i mirno se po brdu zagleda.
– Vidiš sine ovu mrkentu, ovo prigršć griže
Bilo di da odeš, ona uvik zove da se vratiš.

Sve ove meje, sve ove ograde i sve ove bande
Urizane su u tvoje ruke, u tvoj obraz i tvoje tilo
Stoje pred tobon drito i smiju ti se justo u lice…

Naresla je tvoja muka i nosiš ju za svo vrime,
A morebit moreš samo zakantat ispod glasa,
Rećbi da si viši za glavu i dotačeš volat od neba.

Život se je uskoči na te ka smud oli kapricija.

(Zlatko Martinko, kolovoz 2013.,
Slikovnost Ed van Vijk9