Ovo je je prvi dio dnevnika kojeg je Rajka Poljak napisala krajem rujna i početkom 2013. a isti se bazira na iskustvima koje je autorica skupljala za vrijeme realizacije 8. SPIRALNOG KANALA u blizini Assisija, Italija. Mali dio uvoda u ovo štivo je bilo premijerno predstavljeno zagrebačkoj publici u okviru I. gornjogradskog književnog festivala čitano od same autorice 12. listopada u svratištu “Cinkuš”, Mletačka 9. Tamo pročitan tekst je objavljen i u Zborniku festivala – ISSN 1849-1413. O Rajkinom nastupu u Zagrebu izvještavalo se u obadva dnevna lista u Liechtensteinu kao i u “Večernjaku”. Na isti način predstaviti ćemo vremenom i druge autore koji su nastupili na I. gornjogradskom književnom festivalu.

DNEVNIK IZ ITALIJE 1. (PRVA TRI DENA)

Probudila sam se ustreptala od sreće. Misli su mi se vratile na sinoćnju večer uz svijeće. Oh kako je divno bilo. tako strasno, tako nježno nikad me nitko prije nije obljubio. A danas? Danas je divan dan. putujemo zajedno u Italiju. Osjećam, biti će to još jedno romantično, medenom mjesecu slično putovanje. Oh, kako sam sretna. Oh, pa što je to? Dragi, ti si već budan? Kavicu si mi skuhao, joj, micek moj, kak si mi pažljiv. Pa buš me preveč razmazil. A kaj je toooo? Uffff, zar opeeet? Pa kad bumo konačno krenuli? Moram još kosicu oprat, nogice obrijat, pazuhice isto…. jooj, ah, ah, ah mmm.

Figu frišku! Moglo je biti tak, ali ni, uopće ni bilo tak.

Bilo je ovak:

P o n e d e l e k

Vjutro dišeče gda bregi su spali, mi sme se vustali… Vladek lehke, ja teške. Vu strahu od negve vike sem brže bolše napuol jogu naredila, a poklem vu autu odmeditierala. Sme se otputili vu zemlu belu belissimu, vu Italiju. Šteru sem do zdej poznala same po duhe, bi se po domači rekle smerdlivuoče. Nekak se naviek potrefile da sem čez tu škornju slične zemle putuvala po noči. Sem vidla nie nič, same sem tuj i tam občutela vu nosnicah gerdu duhu. Su mi pometnejši od mene poviedali da je to zate kaj je tuj smeštena industrija, kemijskih preparatov, i drugih opijatov. Sramota za povedati, ali to je se kaj sem do zde imela za povedati o Italije: Škorenj pri verhu bi se rekle na severu zemle – smerdi.

Pred puta je Vladek naviek nervozen, pak sem gazeči po jajci kak po minah, na brzaka poterpala se kaj trieba još več kaj ne trieba vu auteka i sme za čas napustili poznati Šaanerski trokut. Tak ja zovem te komadiček zemle na šteroj stanujemo. Šaan se zove gradić, a trokut vu šterem sme mi nastajneni je trokut jer ga okružujejo vulice z tri strani, i po sake po celi dan brenčiju auti da moram pri vlastitem domu štupljine za vuha nositi. Nu, fala bogeku, arivederči Šaaan bonđorno Italija.

Kak je ponedelek othajal mi sme se glibše i glibše zahajali spram sredine škornja. Poklem Milana je put duge vodil spram Bolonje, a ondak naposletku se pojavil napis Roma. Mam sem se zmisljila da si puti vodiju v Rim. Makar je naš cilj bil Asisi. Do Asisia sme sejene trebali cestu – za Rim. Tak nas je vputil Gugl. Nu, Vladek tak nie misljil. Gljih poklem pervoga putokaza za Rim, on je, kak se šika fuljal cestu, a nie baš bila vuska. Pak je ponuorel. Sfundal Bogeka presvietluga, a ja sem mam za negov oprost grijehov, zmoljila tri Zdravomarije i jenuga Očenaša. Tuo je pomogle. Najemput se cesta otprla, a mi sme se našli pak na pravem putu – za Rim. Tak sem se zbilam na licu mesta uverila da si puti vodiju v Rim. Makar sme mi putuvali vu Asisi, pak još male dalše do Svete Marije od Linjana, bi po talijanštini povedali Santa Marija del Lignano.

Poklem pervuga skretanja na krivuga puta, a da nej morala preveč Zdravomarij moliti, sem nagovorila Vladeka da zašteka Navigatorjicu. Je sem se i berže pokajala, jer tuj su zde počele zapraf naše muke. Navigatorjica ti nemu na visokem nemačkem liepe jasne veli: Achtung, im hundert Meter rechts abbiegen, bi rekli, pazi, poklem 100 metri skreni desne… ali ne ne, moj ti Vladek njoj veli: muči ti bedača jena bapska, nič ti ne znaš, pak kak pravi horvacki pometni muž napravi po svojem. Ne bu mene vraža baba zapoviedala. Tak se furt z nju svadil dek ju nie pred sami vulazek vu Asisi konačne ušutkal. Zde sem mu ja muorala glumiti Navigatorjicu, spram guglovem naviganju. Lepe mi je se sprintal i sljikice sem mogla videti gda kam skrenuti trieba. Nu, preveč sem lukala se druge zanimlivejše stvari pak su mi znaki kre puta saki put – zbegli. Z tešku muku sme sejene, čez jene 8 vur putovajna zagledali liepi, bieli od samuga kamena sklesani grad na male vekšemu briegu. Tuo ti je bogek moj dragi sam duom svetuga Franceka Asiškuga.

Kulike znam je živel skrajem dvanajstuga i s početkem trinajstuga mračnuga vieka. Bil je frater šteri se odrekel ovozemalskuga bogactva i se zarekel da bu po siromaški živel. Tak je i napravil. Pomagal je siem, bilkam, živine a i sirotu na svoju sramotu. Velim sramotu, jerbo je bil tak darežliv da je jene babe i zajdnu rubaču sebe dal gdaj druguga ničesa ne imel. Kmičnu cirkvu toga doba i nejne glavešine je fejst kritizieral. Bil je utemelitel Franjevcof a bormeš je kumuval da se osnuje i red Klarisa. Če sem gljih nije lizač oltarof, te mi s dopada. Je se vidi, bil i za jednaka prava muških i žejnskih. Kak se gedek on boril za siromaške i pomagal jim naviek, sejene mi se čini da se negva borba baš čudne zaveršila. Mam poklem negve smerti su ga preglasili za sveca. Glih onie isti štere ja za života največma kritizieral. Mene se vidi da su oni negvuga poštenuga nauka skoristili za svoju pruomociju. Morti tuj ležiju i pervi koreni denešnjih poljitičkih kampanj, gduo bi ga znal. Cirkva je naviek znala napeljati vodu na svuoj žervenj.

Nu da se vernem na naše stranputice. Kak sem več napomenula, Asisi sme vidli z daljine kak se blešči i špinči svojih belem hižam, aj sme nikak nie mogli pogoditi puta do njegvih svetih vulic. Piči Vladek dalše po avtoputu, Asisi ostaje se menši i menši za nami, mene se več gerde pripušile, rit me zabolela, a Vladek se spomine z bogekom na ne baš najlepši način. Pak sem se po trejti put uverila da si puti vodiju vu Rim, jer bez obzira kaj smo trebali vu Asisija Vladek je več dvajst kilometri vozil po ceste za Rim. Stigli mi več do Figlia. Vidla sem da je vrak odnesel šalu, pak sem znuovič zmoljila tri Zdravomarije. Viš ti vrapca – to zbiljam deluje, nis još trejtu doveršila, a več sme našli pravega puta. Sunčece presvietle je bile na zahodu gdaj sme se konačne domogli pervih vulic tog Asisia. Bormeš muoram neke priznati, makar sem prešla svieta od Mača do Lihtenštajna i nazaj, zastal mi je dieh vu gerlu a po kičme su mi začeli prehajati gezmieci. Kak sem godek od putovajna i tulikih Zdravomarij trudna bila, najempudek me obuzel takev mir i dobruota, bi se čak mogle reči lepota vanzemalska da sem i čube pozabila od čuda – zaprieti. Ta se lepota ne da opisati. a bormeč ni tuo neke kaj se vu zraku čuti. Tuo čovek muora doživeti. Vladeku su predelali umetnički instinkti pak je šklocal kak nor. Već se skerem i kmica počela lepiti po krovi, a mi sme još nie našli našega cila. Nekak sme se ipak prestrojili, morti je i na Vladeka Francekov mir prešel pak sme bez velike muke i jada našli vrata… z Asisia i po slabe zasfaltierane cestice začeli zahajati vu gustu hustu. Poklem pervih 5-6 kilometrov sem se počela osečati kak Marica z one pripovetke o Iveku i Mareku. Sem štela silu da Vladek halta da male kamienja naberjem. Cesta – sama jama, okoli fusta. Tegda negda zagledam z ruku napisanuga putokaza za našu Hižu. Kmica se spušča, asfalta je ga nie, cesta se stisnula, pod gumah škriple pravi talijanski šoder. Jezušekmarija, za petranbožji, kam ideme i da bume došli, če bume došli? Gezmieci po kuože su pak počeli hoditi, ali ovie put čist od nekakove jeze. Kak se mi naviek zgubime, da se v napoznate otputime, več sem nas vidla kak celu noč iščemo našu Hižu. Vu tem toga mi se pred očmi pokazala tak veljika spirala lijepe zmotana v prafcu kak se šika, bi rekli ciegera na vure, da sem se mam zmisljla da sme mi vu Misije skapanja pozitivne spirale. Strah je zginul. Za čas, za pervim vuglecem je osvanul pienj na šterem je liepe, makar slabe vidlive pisale: Artestudio Ginestrelle. Juhu, juhu i mesec je več posvetlil puta. Na levoj strane se špinči tienki visuoki čempres, na desne pak dve fajn žejnske – naše domačice. Po boje lica i obešenih vusnih se mogle zaklučiti da su se i nih dve fejst brigale em bume našli puta čez tu černu hustu do nihove Hiže. S čiem su nas zagledale, vusnice su se rezvliekle do vuh, a onda se začule: Welcome, Bienvenuti, Welcome. I otperta vrata liepe jednostavne hiže su nam poželela bienvenuti

Na stuolu velikem, starinskem, kupice z vinem domačem, kak kerv gustem i čerljenem, sira domačuga i kruheka s pod peke. Bogmeč se mam i spripoviedala štorija o susedovom pesu kaj nim je tartufe prenašel, pak sim pak tam, pak dajte najte, za čas je na stuolu bil i pun tenier kruha zapečenuga z masljinovim oljejičem i tarutufem po nem poribanem. Navaljil Vladek kak da nič 3 dena nie jel. Mene je mam prisele, sem se zmisljila kaj se o tartufem i niehove muoči po Istre pripovieda. Poklem sem se hverila da su i te priče niesu zmišlene. Naše su nas domačice Marina – ščer i Adria – mama, baš liepe pogostile, praf po talijanski, bi se rekle: mia casa – dia casa, moj duom – tvoj duom. Povedale su nam v kratke gduo još z nami v Hiže obitava i poželele nam ugodnuga boravka. Marina parla engleščinu i talijanščinu, mama Adrija talijanščinu i z rukami. Dobre je, se razmeme. Vu tem tega, naišel je i pervi stanar Hiže pisec Finec, z imenom Tomy. Veljiki kak dif, mučljiv kak dif i srameči kak dif. Poklem sme na putu do naše sobe skrenuli vu malu kuinicu i tak upoznali ostatek družine, ki je bila pri večeri. Stisnuli su se okuoli stuola 3 žejnske i još jen veliki muški. Barbara z mužem Markecem z Australije, Ann odnekudek z severa Kanade i deklička z dugemi lasmi i iste takvem nogami po imenu Monika, iste z te Kanade.

Naša nas je sobica dočakala lepa, bela, vrejena na puol starinski, na puol umetnički. Se mam vidle da je ovde se prilagojeno umetnikem i oniem šteri se tak osečaju.

Kaj se mene na pervu, osobite doteknule je bile da ovde živiju s poštovajnem spram prirode. Gdaj sme još vu kuini bili, mi se pripetile pušiti, a kak je vu Hiže kajenje prepovedane sem prešla na dvorišče. Gdaj sem se štela vrnuti v hižu sem se nie usudila. Pred vratah, čist gere pri svetlu zunzal je fejst veljiki šeršen. Ma nije bil fejst veljiki, bil je kak kanader. Mam mi se stisnul zadnji diel debeluga črieva. Nes se usudila dojti do vrat, a kamoli jih otprijeti. Pak sem si skadila još jenu, za kuražu – nie pomogla, pak još jenu, nič ni ta nie deluvala. Kuraže nigder. Uonda me potirale tam kam i sveci peške ideju, pak sem juknula čez vrata kak da me si vragi tiraju. A te norec ober vletel je za menu bez posebnuga odobrejna i poziva. Ravne Marine puoljek glave na svetle. Marina nie niti okem trepnula. Ti bogeka kušnem vu petu, kak je tuo moguče, aj ga nije vidla tuljikoga il se diela da ga ne vidi. Ja sem same oči izbečila i čakala na koga bu se perve obrušil. Čakala sem zate kaj sem zadervenela od straha, a ne zate kaj sem čakati štiela. Ondak sem pri drugemu svetlu zagledala još jenuga takvuga kanadera. Po pleča mi se cedil merzli znoj, misljim i da sem prebledela kak melja, a more biti da su mi zubi cvokotalji. Jer se Marina konačne osetila dužna objasniti prisustve ova dva nepozvana i z ničesem najavlena guosta. Mirnim glasem kak špricer i bez prenemaganja je rekla da oni tuj i tam tak doletiju na svetle pak se male poigraju, pozunzaju i unda odletiju za svojim poslem, če im nigdo ne smeta. Nis več imela veselja čakati da proverim aj jim morti ja smetam, neg sem junački požurila po štenga vu našu sobu. Tam sem za saki slučaj spregledala postelju, lomar i još par luknji, pa kak nis ni jenuga kanadera našla sem mogla prestati stiskati kraj debeluga čreva. Još se zmisljim kak im je Vladek probal na meksičke engleščine objasniti da su te dva pod dieku bad guys.

Sejene, pre neg smo se vu postelju hitili, zalepila sem oba oka plava i gliboka na nebe znad nas. Čudaj zvezda je tak bljizu trepetale i svetlele kak da sem vu Betlehemu a ne v blizine Asisia. Mi se vidi da sem i onu celu Mlečnu stezu mogla konačne dobre spregledati. Kaj je još bile jake čudne, je bile da se nič pod kapu nebesku nie mogle čujti same ščurice kak ščuraju, kak da sme v raju. Složilji su takev orkester kak da jim sam gospon pokojni Karajan dirigiera. To je bile zajdne kaj sem pred spajne još čula. Jezušek, morti lažem, misljim da sem zajdne čula Vladekove herkanje, se ne zmisljim več, znam da sem zaspala kak beba.

T u o r e k

Dien mi je započl kak i saki, z jougu i meditaciju, a ondak je se bile drugač. V prizemlu Hiže, prevrejene ex-štale, okupila se družina pri skupnem fruštuku. Da sem po štienga poliehko štiepala, sem čula same engleštinu i talijanščinu, čak je i smieh nekak stranjski zvonil. Za bogeka miluga niesem se mogla zmisljiti kak se velji dobre jutre na engleščine, pak sem skerem pobiegla nazaj. Nu, dočim su me zagledeli si su zgromourili Goood Morning, pak sem ondak i ja nim tega morninga vernula. Još sem se zmisljila reči bon apetit. Ti vrapca, sem pomisljila, još bum i poljigluota postala. Im sem v najbolših liet, če sem nemščinu i nekatere nejne dijaljekte skužierala, zake nej i male talijanščine i engleščine navščila. Makar, muoram priznati, se posiplem z pepelem, da mi engleščina jake dobre prek jezika žuglja, tak se fajn čuje moj „r“ kak da ga onie meksikanci z kaubojskih filmov grgoljiju. Vladeku pak engleščina paše gljih kak oslu sedle, same kaj se on neče z pepelem posipavlati, rajši presipavle preveč toga prek jezika. Dek sem ja meditierala, on je pošarmieral i muške i žejnske, ove potonše, se vieda, male več.

Nu da ne dulim, poklem finuga, praf talijanskuga fruštuka sme se otputili v nabafku oruđa, očem reči krampov i lopat, farbi, platnof i sega ke jene umetničke družine trieba da je v divlini de ničeseg nema. Vladek i ja sme sledili Marinčin avto pun ženskadije. Kupovina sega i sačega – kakva muora. Saka od onieh z Marininoga avta trebala je neke druge – z druguga štacuna. Vladek se pak zakeljil za lopatu, a poklem i balticu i nikak se nie mogel od tega otreči. Skužierala sem v momentu da je on zapraf trebal biti zemloradnik iliti barem kakev šumar. Na jedvite jade sme ga odvliekli vun. Zapetranbuožih, potrošili sme puol lepuga dana na kupovinu. Vrak ti po civiljizacije se poserje.

Vrnuli sme se prav žifčani. Tak da nes imela ni vole nekaj od kuplenoga – skuhati. Neg sem na hrge zrezala pancetu, pljesnivu nekakvu klobasu i kruha z paradajzem pak sem se skup hitila pred Vladeka tak serdito da mi se bokček skerem zagotil. Se mi ga je bil žal. Mam me i srditost napustila. Gdaj sme se dobre spodrigali su nam se i osmehi vrnuli. Ne zgoršega napomenuti da sme tega našega obruoka jeli, neprosvečeni i neupučeni, na stuolu – umetničkem rekvizitu. Več druge jutre je najnem osvanul napis na englečšine: Prosim najte na vem stuolu jesti. Fala. Koga si ga vraga uonda tuj podlekla, baš na te lepe, jedine terase? Poklem sem fort Vladeku pretila, če se nepodobne ponašal, da bu našel novuga napisa.

Marina nam je povedala da tuj zgor, sega fertalj vure huoda, male čez fustu, male čez pola, na verhu brega moreme najti liepu cerkvicu po štere je i meste imena dobile: Santa Maria di Lignano. Pak sem nagovorila Vladeka da skočime do cirkvice. Pinklec na pleča, ideme brega osvajat. Hop-cup nakalup, ti ga na, velim ja poklem petnajst minut soptanja uz breg. Same da napomenem fakta, da sem ja versna pljezačica – na Sleme, za vu priliku na nuoge obliekla lietne natikače, za na paljec, z debelem potplatemi i šlokicami. Šlokice za slučaja da zestanem kakvu kaču, da je posvetlim v oči. Vu svoje sem dobrote i iskusnosti natentala i Vladeka da se tak prikladne obuje – sandale za plažu, da mu nej bile preveč vruče. Baš sme bili pravi – planinorci. Ma niesu ti tuo Švicarske planine prek 2 jezerače, tuo ti je običen, male vekši talijanski breg, rekla sem pred uspona Vladeku tak samouverene kak same neznaljica i nepoznavalec bilo kakvega brega more zvaljati. Neg da se vrnem pljiezanju. Poklem moje zablude da sme za 15 minut pri verhu, sme za časa skužierali da Santa Marija od Linjana oče od nas male več znoja, kervavih nuog i nategnutih gležnjov. Poklem dvajst minut bile mi je jasne da me bogek koštiguva kaj nis zbavila ni jenuga zagovora pri majčice božje bistričke, a obečala sem, one jempudek, gdaj sem misljila da mi je teške. Poklem pol vure plijezanja i natiezanja sem se i z bogekem počela pregovarjati: de prosim te mekni te križ z mojih pleč, pak nes baš tak gerda grešnica, izem tega, kaj ti je pak Vladek krif? Pak nije on bokček tak jake škerti, same fort pozabi drobiž da ide v cirkvu, bu ti drugi put ostavil desetaču. Bogek me skroz ignorieral. Onda sem počela bulazneti, bi se rekle, filozofierati: Aha, to je to, slobodna vuola, moreme se mi i vrnuti. Tuj se pak vu meni stvoril onie vraži z repem i ruogi pak me napelaval da se vernem. E ne bum se okrenula na doul , našla bum ja tu cirkvu makar mi zajdne bile. Tak sme lepe zešvicani, spikani lepim lubičastim skričakem, poklem neke več od vuru cajta zagledali nekakev zidek. Je, cirkva je tuo, sem zacveketala…a nie bila, bile je gruoble. Ti zrak žarki i se koprive peklenjske, de ima gruobla, muora biti i cirkva – i bila je. Preporojeni od friško zbavlenog zagovora sme pojureli otpreti vrata – da vlovimo male hlada i zafalime Gospe na velike milosti kaj nam je ukazala. Vrata su ostala niema, niti da bi zaškrekla. Veljim ja Vladeku de male jače porini, im su teška. Porinul je on, alji si je skrem strupal nosa, vrata i dalše ni makec. Kak sme se gerde razočarali, Vladek je od muke okoli cirkve počel šklocati kak sumanut, a ja sem usavršavala svoju talijanščinu. Poklem trejtuga čitanja plakata za šteri sem bila uverena da je najava za kakšni rok koncert skužierala sem da čitam – osmertnicu. Zavela me lepa mlada žejnska kaj se prehitavala po celem komadu papiera veljikoga baš kak bi bil jen plakat. Oni su se opraščali od ne na te male čuden način.

Žalobnim glasem sem izvestila Vladeka da mi je pun kufer i da me nogice vu šlokicama – boliju. On je bil mišlenja da još ne vreme za vrnuti se. Pak me natiral da iščeme ristorante za šteri sme vidli putokaza na jenom drevu.Mi se vidle da mu je pomet zamutila same jena grešna misel – na merzlu pivu. Kak sem ja, za razliku od njega puna razumevanja, pristala sem na iskanje (neke male je bile i vu tem tega da se meni jake štel kapučino piti). Tak sme mi počeli po tem verhu brega potragu za ristoranteom. Čez hustu, sim tam vrit na ham, našli sme nekakvu hižu, al zgledela je pre kak nekakve mafijaške skrovišče neg ristorante. Tak su nam gerla ostala praf suha, a mi sme se zaleplenih jezikof za nepca čez istu stenu počeli spuščati nazaj.

Tuj sme mogli na licu mesta utverdeti da natikači za paljec zateknuti i sandale za plažu nesu nikakev izbor za spuščanje po talijanskem bregu. Otsmicalji sme se jeden del kak bedaki do pol brega, a onda sem spuknula z pinkleca ručnika, hitila ga v gljiboku travu pak se zvaljala na nega. Misljim da sem zgledala kak da mi duša na nuos oče pobeči, jer Vladek nie ni beknul, same se na tura spustil, a nosa med noge obesil. Znam da mu je teške, teške, jake teške ona merzla faljela. Ja sem iz čistuga očaja jenuga reda – odmeditierala. Kak je sunčece presvietle za fustu zamekle, mi sme se zagrleni i bez reči, spuščali dalše. Oko šeste vure bili sme nazaj. Fala dragomu Bogeku kaj Marina ni bila ni bljizu, da sem ju unda zagledala bi je ja objasnila kak se na vuru gledi. i kaj znači frtalj vure, a kaj jena i puol. Požirake bi je garant spuknula.

Sme se tega jutra dogovorili da bume pred večerku zaorali perve brazde našuga kanala, al poklem toga zbavlenog zagovora santa marije od linjana nesme bili za nič. Vladek je jambral da bi neke jel, a ja sem ga obavestila da je kuina leve od ulaza. Pak sem si nadobudne vu istu prešla narediti pahulice z mlekem. Otprem vrata, a nutri naš Markec po stolu krumpiere nagajna. Na pervi pogled bile su mi dve stvari jasne: Markec ni nigdar vu te svoje Avstralije služil vojsku, a o kuharenju ne zna ni tri čiste. Nu, zmeknem mu škrlaka, kuražne se priel posla. Kumpiere je pobedil za menše od frtal vure, hitil ih vu rajnglek naj se sami kuhaju. Onda je Ann zvlekla odnekudek paketljina malih klobasičkih, hvalila jih Markecu na obradu, a mene izvestila na tečne kanadske engleščine da moremo jesti večerju z njimi.Priznam posramlene, nis ti ja nju skerem jenu reč razmela, težek mi je te tečni kanadski, neg sem pratila nejne perste, vidla pune klobas, klimanje z glavu, i stol nameščen za 6 ljudie i tak sem, kak prava zagorka mam zbrojila da su 2 i 2 jednake je šest. Kak me je same zmantala, sprešla, zanitala, nis vu tem času ni primetila. Neg sem se skup z Markecem hitila na kuharenje. Pak sme osim slabe zdrucganuga krumpiera i klobas imeli još i špagetljine vu sosu i mladu šalatu. Markec i ja sme vse skup berže i z volu zgotoveli. Poklem sem skužierala da je družina gerde lačna bila, a da nigdo nema vole ni talenta za nakuhavanje. Nekak mi se pri večerje vidle da me si najempudek, z čistuga mira jake radi imaju. Pak mi je konačne sunule z riti vu glavu, joj, bedača, pak oni bi tebe tak saki den zapregli. Če ne baš obeda, al večeru da im spravlaš tega bi sigurne rade šteli. Mam sem same sebe reč zadala – s toga vraga nič, kuharim ja domaj i preveč, deca draga, bute vi i dalše paštietu na kruheka tacali, skupaj z menu. Nu, nis nič rekla, same sem pustila osmeha naj pobegne od vuha do vuha i uživala u falama i psalmi. Našle se i vina pak su se jeziki rezvezali, lepe se luft zagrel, se vu glasa pripovedale, smejale i kak se videti mogle – sme dobre prihvačeni. Tak sme lepe omamleni zaspali kak ejngeleki.

S r e d a

Kak se i šika, denes je den iste započel z meditaciju. Poklem toga par kavic i cigaretljinov, neke pod zub i beži na posel. Vladek se zbudil pun stvaratelskih suokov i mam poklem fruštuka napal je terdu talijansku zemlu. Očem reči, započel je težek i mukoterpni posel na našemu zde več zajedničkemu projektu – Spiralnemu kanalu. Ovuga je leta Vladek bormeš već dva bez mene zbegecal (bila sem ja z njim duhem i sercem, a tielem sem muorala guliti svojuga posla). Zde je ove pak vu Italije bi se rekle zaveršni za ve lete. Lepe sme mi tega zasverdlali Slovačka – Slovenija – Italija. Vse sme skup imenuvali Zemle z lubavlu. No, idem nazaj vu Kanala. Muoram se jene male rukave potferknuti pak osim sercem i duhem, i telem dokazati da sem vu Projektu tak lepuga imena: Zemle z lubavlu. Tak mi ovie put Vladek nie bil sam. A bormeš nam se mam s početka pripicoknul i veliki čovek za Avstralije, Markec. Mu je kramp vu rukah zgledal kak dečja igračka, a ja sem ga pak jedva zdigla. Lepe sme se posložili, prignuli glave i jene tri vure grebli kak da iščeme skrite blage. Bili sme vredni. Zde se več lepe i fejst vidi spirala kak čez dvorišče spred Hiže – sverdla. A ni bile lefko. Zemla trda kak kamen, žilaveša i od mene i još tri takve. Nu, Vladek je tak fletno naskakal na štihaču da ju je i spigati vuspel. Markec je svojuga duguga bicikljističkuga tela zvil na puol i grebel i sekel i zemlu hital da je bile milina gledeti. Ja sem pak grebla zemlu z lopatu, pak ju hitala vun, busenje napadala z goli rukah i još sem k tomu – popevala: nis pozabila ni jenu borbenu, a gdaj mi je več duša bila pri nuosu, sem se zmisljila i glori,glori aleluja. Ja ne znam točne kak su te moje domače na Markeca deluvale, ali mislim da me je konačne odlučil ušutkati pak je onda i on pustil svojuga glasa. Gromoglasne je zapopeval nekakvu borbenu na engleščine. Ondak sme si tri počeli zavijati: When the Saints goes Marsh in…, bi po domači rekli: gda sveci zamaršieraju… Ma bili sme kak družba Pere Kvržice. Same kaj naš Pero – Vladek fort govori: Positiv denken, sei positiv bitte. Na kaj sem mam odvernula: Jawohl, jawohl, Arbeit macht frei. Znam ja da je ta tverdna gerde negdar v povesti zloupotreblena. ali v našem slučaju morem slobene na vlastitu tintaru priseči, baš je bile tak: posel nas je oslobodil, če ničesa drugega, seh mislji bedastih, a same je jena ostala: kak još jemput krampa zdiči. Prava meditacija. Uonda je sunčece gerde gljih po nas pripekle pak sme muorali vu hlada pobeči. A i tak sme već nie mogli ni jenuga alata poštene zdiči. Bormeš je zgledale da je i Velikomu Čoveku Markecu ona igračka v rukah gerde otežala. Počeli su i želuci kruliti, i tuo bormeš bez parduona jake glasne. Konačne sme potpisali kapitulaciju i priznalji da se dale tak več ne mre.

Poklem na brzaka improvizeranuga obeda vsa nam je kerv pobiegla vu želuce pak se takaj nič drugega nie mogle neg debeluga hlada iskati i vu horizontale ostati. Gdaj sme si znuovič nadošli, sme se vu Spiralčeka vernuli. Markec je, buogec, kapitulieral skruoz naskruoz. Nič sme mu nije zamerili, hodi viš tam po dvorišču na puol zvijeni, kak da je pod nim onie negov bicikljin kaj ga saki dien po brege nagajna. A nie becikljin, motika je kriva.

Vladek i ja sme zgledi neke terdeša korenika, jer sme i dalše grebli, rovali da je fercale na se strani. Pak sem se vu svoje radoholičarske euforije vu tem tega zmisljila na ORA i kak je tuo negda liepe v bivše Juge bile. Tuj sem zašla vu pregljiboku filozofiju i z analizierala poklempartizansku Jugoslaviju, gospona Titeka i negvu partiju i kak su nas liepe vjedinili vu bractvu i jedinstvu. Sentimentalne sem zaklučila da su te omladinske radne akcije bile fale vredne i za saku pofalu. Vu tem tega slinavlenja i balavlenja mi je najemput na pomet došle da su te vraži omladinci kaj su pruge, ceste i moste gradili, poklem gdaj su vu krizu srednih let opali, te iste pute, moste i tvornice radnikem – kriškraš – zrušili. Od tak teških mislji mi je bormeš i kramp v rukah ožmehel. Z druge strani Vladek je tak vredne kopal da je se več i več vu kanala prepadal. Sam si videl kukmicu na verhu glave kak vu rupe nestaje pak nagle jopet prihaje. Ti bokca, zgledel je kak da se zbilam za udarničku natieče. Vidla sem da je zgrabil pravuga ritma pak sem nie štela ometati. Meni se pak dalše več nie dale, pak sem krampa več za šminku preštimala i usput okoli zvierala kaj pak delaju drugi umetniki. Najemput mi je vse postale čudne. Zake su se Barica i Ančica tak zriktale kak da ideju na proščejne? Ančica je neke po svojemu „ateljeu“ premietala sim tam, a počele su se prinositi i kupice z vinem, nekakovi kanapei i boktedraginemarad, neznam kaj. Se je bile sumnive, zgledale kak da bu niešče neke slavil, a nam nigdo nič povedal nie. Sim tam, mic po mic, nekak sem se krampa riešila, stepla sebe zemlu i promolila nosa bližejše. Mam me Barica izvestila da se slaviju dve stvari: Ančica nam prezentiera svega svojuga dela vu naše Hiže vu pretekla 2 tedna, a ujedne se z nami i oprašča i zutra nas ve napušča.

Ančica je naredila zbilam čudaj tega. V četiri menše mape je bormeš naredila lepih crtežov asiških kapelic, cirkvi, basilik, vulic… Bogek dragi pa gdaj je ona uopče spala? A nie to vse, nasljikala je ona i jenu praf veljiku, da ne veljim dugu, jene 15-20 metri. A na iste se bormeš mogle videti da žejnska zna svuoj posel i da je ovie kraj najnu baš jahkuga dojma napravil.

Posebne mi je zapela za oke, instalacija na sredine: bormeš je sklepala skupaj prave prafcate lojtre i tuo ne jene, neg truoje. One sredine bile su suhem zlatem pozlačene, barem su tak zgledale, bljesikale su se da sem jih jedva mogla i gledeti. Levo i desne su bile plave i zelene ofarbane, vu manire freski po Asisiju. Onda nam je pojasnela da su je te nejne intervencije po prirodi okoli Asisija dohajale same po sebi, gdaj je vidla ves one raskoš i pozlatu po cirkvah vu Asisiju. Oče reči, da je probala oči puka skrenuti i na ostatek kraja šteromu se, kak se vidi, i ne pridaje baš prevelika pažna. Iste nam je povedala da je po husta hodila i po derveču ostavlala male zlate štembilje. Tuj sem si ja pomisljila, joj, dekla draga tuo buju ti vidli same ovie krivolofci kaj okoli nas fort pese navodiju, pak bi mogli još pomisljiti da jih sam sveti Francek špuota zbog krivolova. Nis štiela nič zluočestoga komentierati, same sem je ruku stisnula i rekla: You are great. Bogme i je, veljika. Ili se tuo same mene z moje žable perspektive tak čini. Onda me prešla tak zmazanu i znojnu zimlica pak sem pobiegla v Hižu pod tuša. Diečas sem se, zeslužene prepuščala negvom milovajnu, mi je Vladek prek vrat povedal da se naj požurim da ideme nekam na skupnu večerju. Jezika sem skerem pregrizla, jer sem skerem Jezušeka zrušđila. Kak nej, zde tak trudna muoram još negde vriti sedeti, muozga naprezati na stranjščinu i jesti nekej kaj ne mrem ni imenuvati. Nu jezika sem zeštekala i zbegecala se najberže kaj se dale – za vuru i pol bila sem berajt za izlazek. V međuvremenu mi se od pogleda vu špiglec vernula i dobra vola. Zate sem se jake začudila gdaj sem se vu kuinu spustila kaj su si tak mučlivi. Poklem mi je Vladek povedal da su se nafujnili na Marinču kaj nas nie o semu na vrijeme i z volu izvestila. Nes si misljila da su tie umetniki tak sprogramierani. Nu dobre, vsi sme se skupaj potepli vu 2 avta, pak vu ristorante. Joj, Vladeka i mene je dopala nesreča da sme se peljali z Marinču, gazdaricu i Tomyem Fincem kaj zgledi kak veljiki medek. Tomek Medek je dal po gasu, a Marina bambolina je počela v manire vraže babe narikače, cvileti i prigovarjati: zmenji brzinu, tak moreš po te svoje Finske gasa stiskati, ne po ve samejame ceste voziti, mene se još živi, nigdar ni mertva več vu tvojuga avta ne bum sela…i se tak, jenu bedastoču na drugu. Tomek Medek je stojički podnosel nejnu torturu, ali gasa ni zmenjil. Sejene sme stigli v jenomu komadu, točnejše vu četiri. Mene je znervierala Marinina kuknjava pak sem si pred ristoranteom jenu vužgala. Nes još ni pol cigaretljina stamanila, gdaj je došel ostatek družine. Pak su berže bolše, jake lačni, prešli nutri. Vladek je ostal z menu. Ne zate kaj je štel, neg sem ga za rukava pričvrljela, pak blage zasiktala: im me ne buš tuj zde samu ostavil.

Moja je sreča bila kratkuga vieka, jerbo je čez zavesu od đinđi znutraj izmigoljel derhtavi starec, Don Giovanni, gazda ristorantea. Nič nie rekel, same nas je pomiluval mafijaškim pogledem a z ruku pokazal spram đinđazavese. Mam mi je cigaretljin opal z ruke, a ja sem pokorne sledila Vladeka vnutri, vu ristorante derutni. Ma ni baš derutni, pre bi se rekle jake oskudne bez ukusa nameščeni. Mam mi je bile jasne – tuo je tipični radnički ristorante. Cene mu baš i nesu bile radničke.

Kak je več prešla deveta vura, sem gledela kaj bi lehkuga pojela da me ne žnjara kak one klobase od snočkaj. Isalatisime don Chef (don Pollo) je zvučale tak mafijaški da nis odolela. A tek objasnitva na engleščine: Čučekova persa grilierana, na mehke postele od šalate. Gdaj su naposletku denesli kaj sme poručili sem bila gerdo pogojena. Čuček je davne zgubil sakuga žmaha i suoka, kak da ga je negdo preparieral, niti šnjofa po grilu nega bile. Komadi tie osmuđenih persah su bili pometani po obične zelene, na kverge zriezane šalate. Da ti postelju od šalate hitim posred čela, sem si misljila. Jer postelja nit je bila slana, niti kisela, a bogme niti vuoljejiča nie okusila. Se su mi tuo posebne doneslji na stuol, pak si ja naj sama dielam šalatu. Da sem štiela kuhati večerju, nej došla k nim i još mouram te platiti. Gdaj sem si zrihtala postelu, sem počela poskrivečki špijunierati kaj pak drugi na teniere imaju. Najvekšma su me zaprepastili Dugi Markec i negva Barica. Bila sem uverena da su nih dvoje prosvečene dušice i da same šalatu i nedužne špagetline tamaniju. Kad one, pred moju Baricu, biftek kak od mamuta odvaljen, a kervari gerde kak da bi mu olvejs dobre došel. Zapetranbožji, istuga takvuga je napal i tienki kak slamka Markec. A tak znači tičeki, sem si misljila, puolek vas su i klokani nagrajsali.

Mojem su se Vladeku vu tenieru ftaplali vu verhnju i tartufem – fusili. Ančica je namatala perst debele špagetline z rupah i slasne je usisavala. Monika šteru fort boli želudec, vu strahu je po tenieru iste nekakvu testeninu vu sosu premetala, a vu očmie sem vidla pitanje: What’s that? What I eat? A onda letargični zdieh: Oh, my Stomac. Kaj je Tomek Medek pojel, nis stigla videti, je vse obavil vu jenomu zalogaju. Naša vredna i nadsiem klepetava domačica ja najdužeže čakala na svoju večerju. Gdaj je konačne bila sporučena zgledale je kak da su lazanje, a nesu bile. Pune zapečenuga sira, a odzguori zmazane z nečem sivem. Gdaj sem ju pitala kak se zove to kaj jie, zvučale je otprilike: E la fughi rigoletto. Tak je i zgledale.

Kaj se pile? Vine i voda. Umetniki vine, ja voda, obična, bez mehuričev. Viš, gda sem več pri vinu. Po čem poznaš vse umetnike oveg sveta? Vsi ločeju. Če nečeš z njimi, mam te sažalive pogledaju i škartieraju. Znaju da si nie njihov. Moj se je Vladek dokazal , kak pravi umetnik, mam je bil prihvačen. Oko mene se fejst Ančica trudila, morti sem je bila simpatična pak me nie mam štela škarta hititi. Poklem trejtuga neuspelog nujenja, ipak je odustala. Kak sem pred ono osem liet sama sebi prepoviedala piti, nigdar me poklem nišče, pak ni lubleni Vladek, nije uspel nagovoriti da bile kakvuga alkohola pruobam. Tuo ja zovem čeličnim karakterjem. Makar me se si umetniki sveta odreklji – nem pila i točka. Zde se več niti ne zmisljim zakej sem zapraf prestala piti, ej sem bila kak graba, pak pijem i pijem a nič ne deluje, ili mi je dopizdele da me šefica fort pošilja po pivu vu štacun kak šmerkljifku. Jene sem se jutre zbudila i rekla sama sebe: E bedača, kaj si spila, si spila (a bile je tega za tri živlenja) denes ne piješ. I tak tuo traje: denes ne pijem. Če gduo oče recepta naj me slobene pita. Joj, kam sem vu svoju pjanu prošlost zabludela… tuj sem zde na odlasku z ristorantea, fala bogeku dragemu. Jake mi je bila duosadna večer. Niesem skerem nič razmela umetnike kaj se spominaju, ali su zgledali kak da vmiraju od duosade. Zate si misljim iste da i te don Giovanieve vine nije buog zna kaj, jer da je, bili bi bar male živeši.

Vrnuli sme se točne tak kak sme i tam išli: Tomek Medek po gasu, Marinča po glasu. Kuljike ta vu jene minute reči more zgovoriti, tuo je sigurne za nu Ginisovu knjigu.

Drugi put tu večer sem se vu posteli uverila da te vine ni sluga nie ni Postupu, ni Dingaču a bormeš ni Pelješcu. Kak je pak Vladeku bile? Sem mislila da bum zjutraj naposletku čula: denes ne pijem. Sem frišku figu tega čula. Ali o tem vu… (nastavlja se)