Zadnji nastavak dnevnika kojeg je Rajka Poljak napisala na kajkavskom krajem rujna i početkom listopada 2013. a isti se zbiva za posjete Assisiju, Italija. Mali dio uvoda u ovo štivo je bilo premijerno predstavljeno zagrebačkoj publici u okviru I. gornjogradskog književnog festivala, čitano od same autorice 12. listopada u svratištu “Cinkuš”, Mletačka 9. Tamo pročitan tekst je objavljen i u Zborniku festivala – ISSN 1849-1413. O Rajkinom nastupu u Zagrebu izvještavalo se u obadva dnevna lista u Liechtensteinu kao i u “Večernjaku”

S v e t a n e d e l a

Poklem meditieranja i fruštuka, sem se mam prijela igle i konca, gdaj mi je došla na puomet jena zastrašujuča misel: jezušimarija, za petranbuožih, pak denes je sveta nedela. Na svetu se nedelu ne smeju vršiti nedela. kak na primer: rovati po zemle, prišivati neke z iglu i kuoncem osobite je vu nedelu pogrešne delati. Zmislila sem se tega, jerbo mi je moja babica, naviek da me vidla z iglu i koncem da si očem prišiti kakvuga gumba pometne govorila: aj si ti male bedasta, buš si poumet zešila, same ti šive na svetu nedelu. I viš ti vrapca, nigdar sem babicu nije posluhnula, kaj ona stara bedača zna. Nu, kak je ove bil specijalni posel, specijalne vu zemli, pak još i specijalne žele, misljila sem si da je tega bolše za pondelek ostaviti. Na te bi mi moja babica rekla: Gdou se dobre zna spričati, slobene i v cirkve – perdne.

I tak sme Vladek i ja, sami sebi dali – fraj. Kamera oko vrata, pak vu Asisija. Ovega puta, nesmo srljali kak ovce vu megli, osobite sme odlučili izbegavati onu Basiliku Francekovu, v šteroj su črni fratri na zidi namrčeni. Vladek nie poznati same po tem daj se fort zgubi da nekam dojdeme, poznat je i po tem da naviek sparkiera avto tak daleke od cila da ga poklem z miličniki morame iskati, negda i vatrogasci priskočiju vu pomoč. Niti ovega puta ne napravil iznimku. Cil nam je bil baš na samemu verhu Asiškuga brega – steršal je v zrak i mogel si ga videti ze sieh strani – otkudek gedek da prihajaš. Zate je Vladek, našega avteka sparkieral čist deljem, pri samemu korenu brega, če se tak more reči. Objašnene je bile jednostavne: videl sem vjutri na fejsbuku da je denes svecki dan pešačenja, pak bume male nogice pretegnuli. Bila sem dobre vuole, pak sem naivne pristala na te bedasti predlog. Zgledale je kak da moreš plunuti na tega verha, po imenu: Rocca Maggiore. Zbog Rocce sem skerem roknula, krepnula, dušu spustila. Vladeku su tega jutra nekakšnem čudem, si instinkti bile vuklučeni. Našel je jenuga puta do verha šteri zgledi nišče več ne kouristi. Putec je cikcakal čez masljinike, hiže, i vočnake, i prilične je bil zaraščen vu drača. Bil je baš kak se šika divli i napuščeni. Nigder birtije, ristorantea, ničega gde bi si čovek suhuga jezika sled teškuga uspona mogel male namočiti. Same mi i napuol divla priroda, milina jena. V jenomu sem času štiela ružđiti razne svece i vrage peklenjske, ali sem se zmislila da je ipak sveta nedela na svetu bi rekli mestu, pak sem pak jezika zagrizla. Šklocali sme do verha z kamera, saki svoju, i uverlive glumili jen drugemu kak uživame. Mogel bi nas i gospon Kusturica za naturščeke angažierati, tak sme dobre glumilji. Za jenu vuru, a morti i več, bili sme več na samemu verhu. Zidine i kule kamene steršiju zrak, na ulasku nas lubežliva gospica vu turističke sobice izvesti da jedini ristorante šteri vu te divline egzistiera još ni aperto, bi se rekle – otperti. A zde sme več nie bili same gerde žejni, bila nam je i potrieba. Nadobudne Vladek krene tipa pred ristoranteom ljudski, ponizne i nadasve skrušene zamoliti: Toilet pliiiiz, prego? Niente? Prego sinjore, molto, molto sila pisat. Niente, niente. Doli pisaj u grad se verni. zaperto, zaperto. Okrenul nam je pleča i molto zalupil z vrati. Ovdi pisala ne bute. E tuj sem grdo zgrešila, jer sem pomislila, e pizzz… ti mat… daj bog dragi da se upišal vu gače još tega večera. Kaj sme mogli narediti? Šteli sme videti tega Rocca Maggiore pod saku cenu, pak i pod cenu poscanih gač i suhih jezikov. Tak sme se zaputili vu torna šteri nam se pervi sprečil na putu. Vujdeš vu polukmicu, pak se popikneš na železnu štengu, počakaš male, pak vidiš još par takvih štengi kak se h vidu spirale nekam na gere rievleju. Spirala nam je mam zaleta dala. Gdaj sme došli na pervi plato, sme vidli pak takvu spiralu, pak još jenu, pak još jenu. Do verha torna mi se čist vu nore glave zavertele, nes znala gde sem je, a bormeš ni Vladek. Pak sme našli napisa na šterem sme čak i na nemščine mogli razumne i lepe prečitati da sme zde na verhu severnezapadne kule i da štenge po šterih sme došli pred jezer let ni bile. Bil je pokretni most, šteri se zdigal na saku sumnivu pojavu, nigdo ni mogel same tak vu tu tverđu upasti, nepozvajni ili nepoznati.

Gdaj sme vun zišli, pukel nam je pogled na celi kraj. Milina jena. Sme pozabili i na prepujnene mehure i na žeju. Lepe, lepe, da bi čovek reč rekel. Zate sme same čkomeli i šklocali. Gdaj sme se spram dol spustili, sme zagledali jena vrata, a na njem napis da čez tega zida tverđe moreme dojti vu drugu, još višu kulu. Ma gdo bi odolel? Ni pisale da je zid čez šteri vodi te uski prolaz (kak krtinec) dugi ciglih 105 metri – tou je pisale gdaj sme zašli na drugu stran, na drugu kulu. Od same pomisli da je jedini izlazek z nje, skočiti jeno 50 metri ili nazaj čez tega kertinca iti, mene se stisnul kraj onega mojega debeluga. Pak sem uspešne odglumela kak sem kul i kak se nič ne bojim. Hitila sem pogleda okoli, ne po okolini, nek na još jeno par naivcov i prečitala jim vu očmi istu onu stravu štera je mene vu kandže zela. Kaj sem druge mogla, neg zvierati okoli i diveti se lepom pogledu. Veter je tak puhal da mi se činile da bu mi glake z ruk i glave odnesel. Pogled je bil fakat lepi, velelebni. I o tem nič drugaj nemam za reči. Beži nazaj. stuopetmetri. Činile se još dujžeše gdaj sem znala metražu. Fala ti dragi bogek, zišli sme z tega kertinca naposletku vun, a ja sem se same sebe zarekla da več vu nepoznata vrata ne bum glave rievala. Poklem sme se se jene popeli i na trejtu tvrđu, i to same zate kaj sme tak tvrde glave da nečeme priznati da nam je dosti tega. Spust je bil baš po naše mere. Pre sega sem zagledala da je onie ristorante aperti. Divle sem pogled hitala da najdem spasonosnuga sanitarnuga čvuora. Nigde ni za liek. A Vladek? On se demonstrativne i totalne tverdoglave otputil nadol, spram grada. Kaj si ti ponorel? Ojdi sim, viš da je aperto, moreme se fine isprazniti, če trieba bume i kavu spili. Ma ni mertev, k tomu lopovskomu mafijašu nečem niti pišat iti. Kaj mi je drugega preostale, nek pak zatomiti svoju želu za gromoglasnem kletvam, stisnuti noge pak naduol. Mislim da nesmo več od tri minute, na sreču, hodili, daj nam se na ograde kamene, opletene zelenjavu ukazal tak liepi napis, kak da vu raja vodi: Bar Giardino San Lorenzo. Ne, ne i ne, ne mrem veruvati. Takev blagoslov, takva lepota. Tak liepi šekriet su naredili vu tem Vertu. Poklem sile, sme se blažene smešili, olakšani seli i sporučili kavice i vodice. Vladek je opijen lepoutu Giardina odlučil odrešiti kesu, pak da nam je lubežliva okrugla praf Talijanska gazdarica donesla pijaču, je zaprosil da i jelovnike pridonese. Baš sme lepe ogladneli poklem onakvuga uspona i sieh onieh štengi. A bile je neke i od pretrplenoga straha. Čovek se veseli kaj je još žif. Nigdar ne znaš s tem stari zidina gdaj bu se štera odlučila zrušiti.

Vladek je poručil Tortelini al pomodoro e basilico, a mene je zavela Torta al prsuto e mozzarela. Ta torta ni slatka, to je kakti najpoznateša verst kruha vu Umbrie. Zgledi kak male depše teste za picu, i uglavnem je fine. Vladeku je šjora od Giardina pervomu donesla negovo sledovanje. Drugač se tuoga nemre nazvati. Sledovanje. Sledovanje je bile vu originalnemu viniluplastike, kak je gedek vu tvornice Via Col Gusto – zameržlene. Časna reč če lažem, naj strela boža vu me pukne. Čelavi gazda – kuhar je smeknul z sledovanja poklopec, zgrel, prikeljil te na plastični tenerek kak za ukras, uz te plastična vilica pak tebi Vladek dragi bon apetit. Vladek je po pervi putek ostal bez reči. Ne mogel veruvati očiem, ne same svojem, neg ni mojem. Ja sem same ziehala kak riba na suhem, pak sem zela mobitela i sledovanje fotografierala. Jerbo sem mam pomislilja da tega nekomu poviedam, ne bi mi veruval. Jerbo ni ja niesem veruvala vlastitem očmi. Onda me zgrabila kanžđa čeljična praf za serčeke daj sem se zmisljila da moje sledovajne tek trieba dojti. Štiela sem pobeči. Vladek mi nie dal. Muljec, hrabre je pervoga tortelina porinul vu gubec. Gledal me revne vu uoči i rekel kak nije loše. Gdaj on tega meni za neke moje jele veli, ja sem sigurna da nič ne vela. Gledel me ravne i dalše vu uoči i žvakal i žvakal… Vu tem tega došle je i moje sleduvanje… Tuorta. Tuorta je zgledala pristojneše, makar iste na plastičnjaku servierana. Bojažlive sem zagrizla, a želuček mi se momentalne pobunil. Osetila sem kak mi navire ona posebna verst sline, kaj najavluje same jene: rigoleto. Prijatelski sem rekla Vladeku, mmm, nije loše, oš probat? Narafski da je popušil provokaciju, mam je zagrizel mamec, pardonček, tuortu. E to je bila iskrena reakcija. Potrošil je glumačke umeče na svoje torteline, pa gda je zapičil zube vu moju tuortu nič mu druge ni preostale neg da ogorčene konstatiera: ove je odurne, nejestive, naj tega jesti. To sem od nega pervi put doživela. Jer da je on lačen, more zbilam sakuga dreka pojesti. Ovega nie mogel. Nies ni ja. Pak je kamera šklocnula, prikuplane dokaza za nevernike.

Platili sme tega, kak i saki bedaki, same je Vladek, uputil usmenuga prigovorja za moju nepojedenu tuortu. Naime, torta ni bila ni do kraja kak se šika odmerznuta, kamoli spečena. Da je meni onda neki uličar ponudil našuga čevapa z rubelja, ja bi mu petu kušnula. Nigdar, nigdar pak ni onda, nem pozabila lepoga šekreta, Giardina San Lorenza i sledovanje za naivce. Ne mre se povezati, tak lepe vređeni vrt, restoranček kak bombonček, a oni nutri namesto rajske hrane servijeraju sledovanja za vojsku, morti još od drugoga svetskoga rata zaostala.

Tuo me je gerde rescufale. A ni tu bil kraj. Gdaj sem se zmisljila gde se moj prekleti umetnik sparkieral, došle mi je da mu levuga vuha odgrizem. Nis tega naredila, same sem jezika vlastitoga pak pričvrljila. Gdaj sem poklem pol vure našla duhovnoga mira, sem čist stihuga prešepetala: vozi vu supermarket. Bum nam neke poštenuga skuhala.

V svoje gladi i naive, pozabila sem kak se moj Vladek slabe znalazi vu nepoznatem prostorju. Na meste da krene vu dolni, nizinski del Asisija gdje je bil te veliki, jedini otperti štacun na svetu nedelu, Vladek je, povlečen skritim, ali jahkih silam, skrenul vu sami center, točnejše zaderbužil je ravne vu Via San Francesko, pešaku zonu. Ne zna se, gdou se več čudil, mi vu avtu, kaj nemreme nikak skrenuti nikam drugam, ili pak človečji mravinjak vujne na Vie. Kak se mogle videti, tuj su smeli same stanari sparkierati. A naša lepa črna registracija s poznatem FL je fejst otskakala od tieh domačih. Ne znam šteri je to svetec uz Vladeka bil, zgledal je mirne, nie čak ni bogega zezival na onie svuoj način. Nič nie preklel, mi se vidi da je od silnega srama i tega pozabil. Mene je iste bile sram, pak sem siem vunjke pokazivala da nesem ja z njim. Usput sem gledela, s knedlinem vu gerlu, gdaj bu nam zapaftal karabinier z palicu. Tega se iste nie zgodile, zgledi da na svetu nedelu ni oni ne delaju. Premerili sme Via San Francesko s kraja na kraj, točnejše, sveti Vladek nas je dopelal ravne na Plaza del Comuna, bi se rekle na glavni Terg. Jedina vulica šteru je uopće mogel skrenuti, bila je paralelna z Via svetoga Franceka, vu smeru ze šteroga sme gljih dogmizali. Aj triebam uopče reči, da je i ona bila – pešačka zona? Tuj se zde Vladek zmisljil onieh svojih najdražeših kletvi, pak jih je obilate nucal, na moju veljiku žalost. Se jene, ni vu tej nie bile ni jenuga miljeka, da ga za zdravliče privpita. Gdaj sme se konačne zvlekli vun, je Vladek počel kričati i jujuhkati kak da sme vu svati. Gdaj sem pitala kie ga vrak goni, je slavedobitne rekel: A gdoj se još z tem more preštimati – prepeljal sem se po zabrajnene zone. Jesi igrač, sem si misljila. Od jada, nis mogla ni pregovoriti.

Poklem tega, nekšnem čudem nesmo ni jemput do štacuna puta zgubili. Od glada i sekakvih bludnih mislji, oči su nam preveč zejale, pak sme pokupuvali sega kak da ideme na mesec dan vu pustoš. Tega svetuga nedelnuga predvečerja dišal je z naše kuinice krumperek na putru i poliehke se pekel vu pravem šporetu na derva, diečas sem napacala svinjsku vratinu i krmiče z češnakem i nekih svojih tajnih zestojki, pak su se dišeči krčkalji na maslu. Preferieram puter vu kuine, otkak me jen Francuz presvietlil i otkril mi tri tajne francuske kuine (šteru izuzetno cenim): empak tri tajne su: 1. puter, 2. puter, 3. puter. Mladu šalaticu sem jake pažlive i nežne oprala i začinila z male maslinovuga vuoljejiča, aceta i meda, tek male posoljila. Liehka i friška je bila kak melem za rane. Nie zdej da se falim, ali tuo je od pondelka bil pervi kak se šika uobed. Punu kuostrolu krumpereka sme očistili do zajdnuga, mesa je još za drugi dien ostale. Mouram biti samekritična, mese mi iste nije bile mehke kak putrek, ali pravdam se, jer ne po propisu par vur vu mojem tajnem pacu odležale. A kak se vidi, su nam vu supermarketu iste male starešu svinju podvaljeli.

Gdaj sme se poklem Marinčike požaleli kakšnega sme sledovanja dobili za jesti ona je same zakimala z glavu z negodovajnem, pak nam rekla: je istina je, ovdašni ludi su jako neprosvečeni i radi turistem podvaljujeju škart i nič koristi jelo. Zate budete jako pažlivi gdaj naručujete. Tega je bormeš bile pune lehše preporučiti, neg se tega deržati gdaj vu želucu zakruli, a jelovnik na talijanščine.

Spustila se skerem i večer. Vujne je najempudek nastal fljojs. Puhale gerde, kak da negder ober nas pijavica divlački verti svojuga repa, zlejal je gusti debeli dežđ takvu snagu da sem se ja splašila za našuga kanala. O kerpicah štere sem našila, nes mogla ni misljiti. Gdaj je vudril te pervi gerdi nalet, poklem se zmienšale, ali je bormeš na mahe pak curele i močile. Nie več za tu svetu nedelu bile ni govora da bi ja neke mogla oko svojih lepih žela i kerpic napraviti. Se je bile vu božih rukah.

Znuždene sme se povliekli vu sobu. Zaspali sme iste tak, znuždene i zmeržlene, kak dve žvače sme se stisnuli.

P o n e d e l e k

Nej znala povedati točne kak sme se tak zbedierali, nu ni ponedelek nam nie začel obečavajuće, vujne je bile još male tmurne, makar se sunčece tuj i tam čez obloke z tešku muku prebile. Vladek je začel gerde kruohljati, vlovil je nekakvuga virusa, pak se vu nem rezigral kak ščerašnja oluja, nie ga bile za poslušati. Pak onda na negvem licu onie mučenički pogled: joj bum ti hmerl, aj bi mi čajeka skuhala?

Barek je kupila nekakšnu čudetvornu mešavinu bilki, pak nam je velikodušne ponudila da se lečime. Proubala sem Vladeka na psihičke več nek visoke demagogije uveriti da bu mu poklem same jene šuoljice bolše, al nekak mi nie uspele. Tak sem buoga ja, celi pondelek muorala čajeka nakuhavati, a bormeš i tuorek.

Vreme nam ne bile preveč naklojnene, nu sejene se nekak okoli dve vure sunčece čez obloke pokazale, pak sem ja zmogla kuražu i zašla svoje zde več nestrplive kerpice sa želah prišivat. Bile je se prije neg liehke, par vur sem potrošila aj ni jenu sem nije preklela, ni jenu nes prišila, a da nekakšna dobra misel ni uz nejnuga prišivka dohajala. Jenu sem zešila za lepi i prosperitetni život siem kitem vu siem morjem, jenu za kljimu da se ne klima, jenu za lačne i šteri se tak osiečaju, jenu za ovisnike od opijatem, posebne za drogeraše, jenu za pedofile naj jimbok presveli poumet, jenu za iskvarene bankarje da se popraviju, jenu za muktaše da na deci ne skuplaju penez, jenu proti tergovine žejnskih tela, a još več duš…da ne nabrajam zde znouvič, kak se šika, 93 sme odredili, a ja naredila. Uz buožu pomoč, tega muoram naglasiti. Diečas sem našivavala, bile je liepe, nebe mi se smiljile. Tegdanegda, pred par zajdnih, počele su liefke perve kaplice diežđa prepadati. Em pak me niesu stirale. Zmirene, potihe i z vuolu vse sem je prišila, a onda jih je dežđek liepe opral. Nie farbu ispral, zgledale su kak daj su buožuga blagoslova dobile. Bila sem zadovolna. Kanal ze siem je bil tiptop gotov.

Tuj sem sejene i ja nekak pobrala virusa, ili mi ga je negder Vladek nežno uvalil. Jerbo je poklem prišivanja i mene grouznica zdermala, empak ne i zrušila. Gduo bi nam čajeka kuhal? Tak sem ja i sebe i Vladeku viruse tetošila, pak sme skupaj dregetali i vu postelje kak da zipka se ziba, zespalji.

T o u r e k

Kak se več more znati, sunčece presvietle najlepše svietli i greje poklem diežđa.

Tak je bile i tega jutra. S čiem sem oči otperla vidla sem tega sjaja čez uokne i znala sem da bu lepe. Pred nami je bil dien napet kak puška. Šteli sme još jenuga izleta vu Asisija sikak nerediti, a bormeš h večerku, baš kak se šika, po običaju Hiže, svojuga dela prezentierati.

Pak sme pometno napravili plana kaj bi šteli videti: Porcijunkulu vu Cirkve Santa Marija degli Angeli. Zapraf su tuo dvie Cirkve, Porcijunkula je mala, liepa kak kapielica, tuj se sveti Francek moulil a pri nejne je blizine i vmrl 3.listopada 1226. leta gospojnuga, pak su poklem oko te male, zgradeli jenu veljiku, pompoznu, Svete Marije anđelske. Poklem tega sme šteli obiti Santa Croca – pečinu vu štere je Francek bogeka moljil i meditieral, pak cirkvicu Svetoga Damjana i cirkvu Sv. Klare.

Startali sme slabe, skerem bi se usudila reči, po našem običaju. Našli sme parkinga gljih pri same Cirkve Svete Marije anđelske, pak nas je simpatični, alji nemilosrden prodavač povrča i tiketa za parkinga izvestil da se morjeme tuj parkierati same jenu vuru. Vladek i ja sme se zaverenički pogledali pak v misel jednak pomisljili: pak kaj bi jenu vuru vu jene cirkve gledelji. V kakšne sme zablude bili tega uonda niesme znalji. Več pred ulaskem sme nekak zaderveneli. Takšna sem vrata još bormeš ni na jene cirkve nie vidla. Zrezbarjena z rukami pravih majstorof svoga zanata,a gere na verhu svetlela je na sunčecu gospa Marija, i bormeš je se ta zlata rubača fejst šikala. Sme okoli Cirkve obilazeli kakti mačka okoli miša i škluocali. Ondak sme nutru zašli, a tam dalše ravne pred nami je bila ta mala cirkvica-kapieljica Portiunkula. Nes ja nič o nje znala, nes ja nič ni očekivala, nes ja nigdar niti preveč po cirkvah zverala, a bormeš sljinila sem nie nigdar. Kaj se tuo zgodile, če znam objasneti. Morem same, verne povedati kaj mi se zgodile. Kak sem čez tu veljiku spram male dohajala, najempudek su me suze obljejale. Nes ja plakala, nes ridala, niti tuljila. Jednostavne su mi suze curele kak onie dežđ večerku prije. Nies je mogla nikak zaustaviti. Na kaj sem tuo nabasala nie mi bile jasne. Sramečki sem glavu prignula pak pruobala lica zbrisati, pak sem nekak z krajičkem oka vidla nuovuga čuda – Vladeku su iste suze curele. Nič mi nie bile jasne. Im sme nie niti on niti ja nikakovi vierniki, niti se prepuščame vierničkem transem. Mi sme pri misije kopajna kanala, same male navernuli da vidime slikarije toga doba i tuo več na muoj neg Vladekov nagovor. A zde tu kak dva upitnika stojime i suze prelevame. Vu par minut sme se nekak zgubili vu drugemu vremenu i pruostoru. Gdaj zde, z odmakem od par den premišlam kaj je tuo mogle biti, pomaže mi gospon Yung i negva teorija o kolektivne svesti. Gdaj sem one pred par dane pomotala svoju potrošaku gruoznicu z kolektivnu sviesti, nie mi bile ni pri peti da bi na tak nekej mogla nabasati i tuo tak skerem. Same se tak same sebe morem pravdati. Če se pravdati trieba. Ili je te bile one Pole o šterem se navelike respisala pred par liet gospoja Lynn Taggart, ili zbilam na te Zemle postojiju takva mesta, gde čovjek dojde v dodira ze samem Stvoritelem? Jezušek Marija, same mi skačeju upitniki nad glavu, a ja sem nemuočna odgovora pravuga za se najti. Vu sakem slučaju, gdaj sme k sebe došli, sme začeli obilaziti okoli Cirkvu, dopale nam se makar nie tak načičkana z certanija kak ona Basilika Sv.Franceka, šteru je Giotto onak nafrigal. Saka nemu čast, meni su lepši beli, svetli zidi. Onda sme još videli jenuga kipa svetuga Franceka, šteri mi se videl i nie tak liepi, ali me začudile kaj na košarice spletene od pruča, šteru v rukah kakti derži, sediju dva bela goluba. Velim ja Vladeku na vuhe: jebte, pa gle ovie su na baterije. Vladek me bele pogleda i otšeče dalše. Ja kak znatiželna ameba nastavim lukati vu golube. Kak su tega neredili da zglediju tak živi? Vu te čas su se obadva stresli, onak zapraf su perje pretepli, pak si počeli klune klucati, baš kak da se kušujeju. Zapetrambožji, pak su oni živi da živeši ne mreju biti. Pa kak sem bedača mogla tega prevideti? Tuj sediju i nikam nečeju odleteti gdaj im ja pred klunem stojim? Pak sem još spuknula mobitela pak je šklocam. Premenili su puozu, kak da mi se namieščaju za slikanje, a niesu odleteli kak bi človek tega očekival. Tak sem se zaprepastila, da sem same triput šklocnula. Pak su mi demonstrativne okrenuli piške, dost si nas ometala. Onda sem Vladeka same z ruku zezvala naj se vrne. Imel je kameru pri sebe, pak sem mu naredila naj je snimi, 2x po 8 sekundi su lepe jen druguga kušuvali kak po naručbe. Nes tega mogla veruvati. Veliju da su fort tam. Kakef je popovski trik tuj, sem se vu pervuga časa pitala. Poklem, gdaj sem još tega čula, počele mi je biti čist normalne kaj su te tiči tam, brez straha od ljudie, i žele da nekam pobiegneju. Ak je kakšni trik vu igre, naj se puopi sramiju, ak pak nie – onda je tuo prave čude. Pak sme onda još pogledali verta z ruoža štere su one jempudek ostale bez ternja gdaj se Francek med nje hitil kak bi sebe samuga koštiguval. Niesu ga štele pikati pak su terne mam otpustile. I poklem nesu navodne zrasli. Kak sem gerdi skeptik, pak se pitam vu šteremu germu leži zajec. Iste se pitam zake sem tak teški neznabožec i zakej je tak teške vu čuda mi veruvati. A saki nam je den tak i tak spunjen s pune čudah razneh, same ih slabe primetime. Gdaj vidim ruožu kak lijepe cviete kre puta, sama od sebe, ona je jene čude. Pak poglej te sunce puonad našeh glav? Kaj tuo iste nije jene velike čude? Čudaj tega je vu prirode okoli nas čude, a mi slepi pri zdravi očmie nič ne vidime.

Ja sem se pogubila vu te Cirkve skrouz na skruoz. Vladek je imel negde vu nutrine narihtanu vuru da mu zezvoni poklem jenuga časa, kak je bil parking dozvolen na same uno ura, mi sme muorali z Cirkve za vrat nanuos pobeči. Sme same par suvenirof još berže kupili i bež berže da pauk ne odnese. Vu sakemu slučaju, bile nam je čudaj tega preveč.

Krenuli sme put Santa Croca, pečine, i narafski po starem dobrem običaju sme neke vremena potrošili jer sme se pak zgubili. Gdaj sme došli tam gde započine put, spram pečine, našli sme cirkvicu Sv.Damjana, šteru je Francek počel obnavlati gdaj je od samuga bogeka takvuga naloga prijel. Poklem je tekar skužieral da je ovie od nega vekšu žertvu iskal, a ne same da obnavla fizički jenu kapelicu. Dalše od te kapelice niesme išli. Vladek je trdokorne terdil da je tou Santa Croca, a ja sem terdila da se do Croce dojde poklem 45 minut pešačenja vu breg. Misljim da sem bila vu pravu, ali nesmo se uverili jer je vreme nekak prenagle scurele, a mi sme imeli same još cajta za skočiti 15 minut do Terzo Paradiso. Tuo je pak maslinik zasajen vu obliku osmice štera ima jenuga terbuha sriednuga – preveč. Dobre se videl te Paradiso z one gorne kule – Rocca Maggiore. Gdaj smo te Paradiso prenašli, već su nam želučeki gerdo kruleli. Pak smo se male prešpancierali, čez osmicu i bež nazaj. Tam blizu sme videli, a još več našnjuofali, ristorante. Dišala je janjentina, nepogrešive sem ju nanušila, pak sem vesele Vladeka munula pod rebra, e zde bume se konačne liepe najeli. Ne mreš fulati, janjetina je janjetina. Osteria del Mulino se zval ristorante.

Mlada gospodična kaj je konobarila, nas je lepo u vrta otputila, i mam sme ju prosili da nam tega jelovnika donese. I donesla je. Pak sme se nie mogli znajti, sama talijanščina, nigder engleščine ili nemščine za pojašnene. A dišale je vu zraku liepe, kak da se negder janjec na ražnu verti. Nu, nie ga bile za videti, tega ražna. Mogle bi se reči da sme zajca dievali na ražen, a zajec je još po huste biežal, očem reči janjec. Od celuga sme jelovnika skužierali jedine Grill nekej. Pak sme konobaricu kaj je slabe natucala čak i talijanski ispitali kakvuga ona te grilla nudi i kaj dobimo vu jene porcije? Ona je pokazala da se dobiju četiri komada mesa… Meni je mam pred očmi zatitrala Plata za dvoje z restorana Maksimir. Pak sme Vladek i ja zaklučili da nam je jena porcija dosti. Poklem jene vure, ili neke menše, donesla nam je na nekakšnem čist malem tenieru – tu platu za dve osobe. Moram naglasiti za dve jake naivne osobe. Nekšteri bi rekli, za dva bedaka. Kak se zeme. Ja terdim da je tuo se jena velika zavera protif mojuga želuca. Na tenieru je bile za videti dve kosti i jeden ščapic žlundrami okičen. pardonček, i jena klobasička kak muoj paljec veljika, same neke male depša. Pogled vu Vladekove uoči govoril mi je o negvoj posvemašnoj patni. Vu negvom sem pogledu vidla i svoj, isti takev same još neke male začinjen z ozbilnu pobunu, rekla bi čak revuoltem. Pa kaj oni misliju, gduo sme mi, štere sme pripizdine opalji da nas ovak da proustite zahebavaju? Pardonček na izrazu, ovo je čisto hebanje vu zdrav muosk. Ja sem skroz pristojna, u ovem slučaju, na tak nepristojnu ponudu. Još mi je pune reči došle na jezika, a se do jene su zaveršavale na..banje. Viš, tak su nas pak zaskočili, da od neverice, čistuga neveruvanja, niesme se zmisljili jedine pometne stvari šteru sme triebali narediti – zdiči se momentalne, ne platiti te smešne zapečene koščice ni jenuga ojera i demonstrativne visoke uzdignut čel i glav napustiti Osteriu del Muljatore. A ne, Vladek me lepo, pristojno zamolil da začepim ak boga znam, i da pojedem ak očem vse, same zabogamilugazačkomi. Okej, iz čistuga sem protesta zgrabila najvekšu kuost na tenieru i napala ju ze sieh oružja: z nužem, z persti, zubmi. Osim neke skurjenih žlundric, nies na te koščurine nič mesa prenašla. Vladeku je na raspolagajne ostala kratka koščička od rebra, iste bez mesa, klobasička kaj se činela kak da bi saki čas mogla eksplodierati, i te ščapic na šterem su osmujene žlundrice šteršale saka na svoju stran. Gerde za videti, još gerše za jesti. Od priloga sme nič nie dobili, pak sme očajni kruheka zaiskalji. Same sme šalatu dobili, šteru sme si iste upropastili, z užeglim žlj kategorije vuoljejičem. Gdaj sem si dobre persti zmazala, usnu šuplinu zagadila, sme se tak lačni i povredjenih osečajov otputili nazaj, vu Hižu. Če nič druge, tam vu frižidieru ima sega, bum pak muorala kuhariti, ali bume se bar najeli. Nes računala da do Hiže triebame pune zavojof prejti, kak ih s punim pravem Švabi zoveju – kurve. Daklem, poklem trejte kurve, mene je počela guorka istina želuca vu gerle prihajati. Nis štela tega veruvati, pak ne bum zde muorala još i tega rigoleta obavlati. Guorka istina pak na gor, ja ju tiram nazaj. Neče stati i neče, oče vun. Stani, sem zakričala, bleda kak kerpa je sem znala da sledi ono kaj najvekšma merzim na celemu svetu: rigoleto. Presudile je mislim gdaj sem pomislila da su nam morti onie vu Ošterije del Muljatore servierali pečenuga piesa. Vse se zdigle i štele vun. Nikakšne čude tuj nie zde pomogle. Molto grosso rigoleto. Poklem prvuga izbacivajna berže sem se premestila, jer me pogled na nereda tiral na još tega rigoleta… čista ekološka katastrofa… nes mogla veruvati da se te dogaja. Poklem trejte hrpe, fejst sem zagrlela jeno drevo i tresla se kak šiba na vuode… zišle je z mene se kaj sem tega tedna svojemu prepačenomu želučeku prinesla… pak se pobunil, frljjjj, neš ti mene trovala, bedača jena, vrak ti puo te talijanske splačine… brljjjj. Vladek je nemočne stal, obesil nosa, i rekla bi samuga sebe koštiguje kaj me tiral onuga piesa gutati… i naj mu bu, naj se same koštiguje, nie mu gorše neg mene… buogek dragi i premilji, da bu temu kraja? Oči su mi skočile vun kak šaranu gdaj se na pojmice peče. Poklem tega sem se stropoštala na sic i nemočne sem zdehavala, gljih kak da bum zde na vmerla. Pred oči mi je dohajal Kanal i kak ga trieba prezentierati, a vu glave sama slama…

Gdaj sme pred Hižu dogmerali, sem se stropoščala vu postelu kak da sem od same slame. Nis vu tem času mogla ni zamisleti da bi se mogla znuovič zdiči i još tega dena neke pometne napraviti. Same sem glibuoke zdihala i samu sebe fejst žaluvala. Vladeku su vse ladje potonule, gljiboke. Pak se prešel tušierat. Tegda negda sem prikupila snagu i prešla vun, na sunčece. One mi naviek pomore, pak je tak i zde bile. Za male več od fertalj vure sem osietila da neke morem pojesti. I jesem, dve šnitice dinje. Pak i neke male mleka z pahuljicami, švicarskih za saki slučaj. Tuo me je zdigle od mertvih, kak onuga tiča feniksa. Na berzinu sem se vu reda dopelala, hitila na se male bolšu obleku, pak vu Kanala. Tam sem zgruntala kaj očem več duge reči, a nis priliku imela, na ova tri zadneša kanala. Kak i naviek, moja je muorala biti zajdna. Same tuo kaj sem ja štiela reči, nies mogla na vem svojem materinskem, jer je publika razmela same engleščinu i talijanščinu. Fala bogeku dragemu kaj mi je dal tak pometnu ščer pak još navudrenu za strajnske jezike. Vu času mi je esemesem sprevela moje umotvorine, a ja sem ondak poliehke vučila kak se šika izgovarajati:

Standing here at this very Moment, aware of Ourselves, we are Part of Eternity. Let’s close our Eyes for just one Minute and share our Love with Earth.

Je došel i Vladek z kamerju, pak me inkognito snimel, tak samu. Pak je bil tak pometen mi je pustil snimek. Za petrambuoži, aj sem te ja? Guorka me istina posredsriedi čela zgodila: nigdar ne bum dobre Engleskinju glumila. Nie tuo bila engleščina z meksičkim naglasakem, a ne, bila je tuo engleščina z pravšnem, napatvorenem, urojenem kajkavskem naglasaakem. Ti Oxforda i Kamgridgea ni oni me od tega ne izliečiju. Gerde za čujti. Na moje Engleščine. Pak sem tega zgovorela na svojem materinskem: Stoječi vu tem času, zde i tuj, svesni sebe i ovuga trenutka, mi sme diel večnosti. Zapreme zde uoči na same jenu minutu i podelime našu lubav z Zemlu. Tuo je jezik šteri mi vuha miluje i serčeka tetuoši. Vu teh par reči sem štiela pune tega izreči. I falim bogeku, poklem mi se videle da su prisutni i te kak občuteli moju molbu. Nu, još sme nie započeli. Čakali sme da se kmica vu našuga Kanala spusti, pak sme po nem onda pometali male svečice štere su na povetarcu dregetale aj se ni jena nie zgasila. Osvetlavale su vse zavoje vu Spirale, blagu, trepeču svetlošču. Bile je baš nekak jednostavne liepe. I ja sem se občutela tak – jednostavne liepe. Dobre i tople mi je bile pri serčeku. Tak nekak sem občutela da je i Vladeku. Pak su onda prijahali vsie stanarji naše Hiže, a ja sem svojuga zagovora konačne mogla i pred nimi zgovoriti. Pak je Marinčika, iste tak liepe tega na talijanščine puoviedala. Pak sme si skupaj jenu minutu vu tišine Zemli svoju lubav davali na respolganje. Same su ščurici ščurali. Poklem tega svečanuga čina, Vladek je vu par reči objasnil kaj tuo mi dielame, i zakaj. I kaj sme duo zde naredili, a poklem je se skupaj još i z video filmem potkriepil, kak i z prilogi štere su nam drugi umetniki, z raznih delov sveta pošiljali. Bormeš je bile zanimlivo i veselo. Kaj nas je največma znenadile, bile su kuharske bakanalije štere je naredila mama Adria: juha od leče, zapečeni kumpieri ze sirem i tartufi, klobasičke, zdinstane patlidžane vu nekakšnem finem sosu, šalata friška, mlada. Vse domače i z lubavlu pripravlene. Draga Adria zbilam si je dala truda. Dragi Bogek, mene je bile strah još neke vu želučeka tega dana spustiti da ga pak na protesta ne zezovem. Nu, gdaj sem vidla kak se žejnska fejst potrudila, nes mogla a ne pojesti od sega pomale. I tuo mi je male, bile preveč, nu, kak je zbilam bile fine i ukusne, i želuček se primiril i pomajačekenu nadohajal. Poklem večerje, su još i ogenj vu velikem lepem starinskem kaminu nakurile – praf lepe sme se oprostili od družine. Nesme duge ostali, zjutri ob deveti morame na puta nazaj, vu Kneževinu.

Zaspali sme kak ajngeleki, z lepih čuvstvah i misli. Kanal vujne ostal je još jene vreme osvetlen, a onda su i svečice svojuga sna poiskale. Na vetru su još same moje šare kerpice lepetale, pošiljale su naše žele vu svemira. Znam da se buju ostvarele, nekštere prie, nekštere poklem.

S r i e d a – o p r a š č a n j e i p u t n a z a j . . .

Na mehkem vankušu sem se zbudila z glavu v štere je čudna pesma zvonila: Vračam se Zagrebe tebe, tebe pod zidine stareeee… uonda sem skapierala da sejene još spim… jerbo nes uopče triebala Zagreba iti, neg nazaj, vunu Vukojebinu, pardonček, vu Kneževinu. V momentu su mi se lađe potonule… pak sem još majčekene oči zaperla i poslušala gospona Morgena kak se vrača na obale Save. Vu tem lepem senjarenju me grube prekinul Vladekov ulazek vu sobu. Več je bil berajt, čudaj stvari poterpal v našuga Francuzeka i kak mi se vidle, mene bi najrajše tak kremlivu skupaj s puostelju nutru zarieval. Vrak mu odnesel tu putnu gruoznicu jempudek zanaviek. Same me gifta s tiem svojem prehajanjem nutru-vun. Kak da mu je onie seršen vriti klepeče. Nu, vidla sem da je vrak odnesel šalu, pak sem se pretegnula, jogu zbavila i odmeditierala čist mirne i ozbilne. Kak sem mogla videti, triebala bum, bar pervu vuru putovajna – čelične nerve. Zmislila sem se kak je ščera Vladek po Asisiju jambral: da mi je same znati de je ta vraža cesta štera na avtoputa pelja…

Gdaj sem se vu kuinu spustila, dočakala me Barica i Markec, več vu pune spreme za bicikljarenje. Zgrabil je Vladeka vu svoj medveđi zagerlaj pak ga tepel kak da je mali plišani pesek. Kakef prizor, da se nes tak smejala, bi se morti i resplakala. Markec je uonda prešel, a Barica me na fejsbuku upuoznala s celu svoju familiju, bližešu i dalšu. Nekak mi se vidle da me ne otpušča rada. A taaaak mi se pušile… Konačne je osetila moju nervuozu pak je laptopa vu stranjku diela. Zišle sme skupaj pred hižu i pripovedale kak se šika. Z rukami mi je poviedala da je se vidi, moje serce je tuj pri Kanalu jahke privezane, i da mi tie kanali pune značiju. Pak je rekla da se same vu tem prafcu naj i dalše krečem i da bum sigurne pune doprinesla… čemu zde se več ne zmisljim. Im me je skerem rescmoljila, pak sem prehitila temu na vreme, kak se sunčeke lipe vu rose na vem drievu hmiva… Pak sme tak male obadvie cmunjkale i kniedline gutale. Sem si misljila, gduo je te vraže restanke zmisljil triebale bi ga na galge. Uonda je Vladek prekinul idilu i rekel če tak nastavime, da nigdar dima neme stigli. Pak sme se počeli stiskati jeni z drugem, kriškraš. Na poslietku je odnekud i Monika Harmonika izmiguoljila pak se obrušila na Vladeka, doslovce mu se oko vrata obmotala, nu je vidla muoj otrovni pogled pak se beržebolše z njega i izvliekla. Mene pritekla pak istu radnu ponovila, no dobre, naj je bu, stisnula sem i ja nu, nie ona kriva kaj se Vladek na dvojstineke maloletnice vužigle. Vušli sme vu avto pak po malu krenuli… nu, viš ti Bareka, kak serna je skočila vu Kanala, zavliekla se gljih vu sredinu, pak nam je z nutri mahala i puse pušilala. Pustila je i suze da je se z očie cediju… hebi ga, da bi čovek na te rieč rekel, pustila sem i ja svoje – naj curiju. I tak sme prešli, po šoderice i sama jama i kurva ceste ravne v Asisi. Još jemput sme vu negve svete vulice došli z dva razloga: Vladek je za sineka još kakvu sitnicu moural kupiti i karte nekšterem dragem ludem konačne poslati.

Zapetranbuožih, a te moguče? Diečas je on iskal poštu, ili kakvuga kasliča, ja sem otkrila vuličicu kak fijolicu – aj triebam reči? Vsaka hiža je v prizemlu štacuna imela. Joj, buok moj dragi, sačuve me tega zla. Kak sem nie vidla se te štacune z srebrem, oblieku, još tuorbic, srebra, rubač, rubač, rubač… osečala sem kak mi prihaja… jezik se osušil, čuba obiesila, sline nadošle… o ne, ne pak.

Prekleta potrošačka gruoznica zeskočila me vsu snagu… Štiela sem Vladeka popitati za zdravliče, kak mu se vidi one lepe male respele na tak lepem lančeku, aj bi me morti čuvale od sieh napasti… Vladek me nekak uopće ne doživel, same je koraka uberzal, tak da je bil pred menu na deset metri. Mi se vidi da je precenil da je tuo sigurna udalenost od mene do negvuga pobelara. V momentu sem skužierala da te dve gruoznice, negva putnička i moja potrošačka nikak ne pašeju skupaj. Negva je pobedila. Če sem nie štela nastaviti puta mučeči z obešenim nosem, bile mi je bolše da se mam, momentalne izlečim od svoje versti groznice. Tak sem i napravila. Jerbo sem se zmislila one babičine: pametnejši popušča.

Gdaj sem več pri babice, da pojasnim, te se diela o moje pokojne babice Jane. Ona me othranila, bogobojažljive odgojila, bi se rekle, nafčila me se piekla bojati če kumu zla naredim i zafaleti bogeku sa saki dien šteri živim. Sem tega, navčila me jenu jake važnu stvar: imaš dva vuha, če ti duo rit jie,tuo če reči te ogovarja, čez jene pusti nutru, čez druge vun. Tuo je bil dober savet, i jedini način da se mali fačuk, kak sem ja bila, zaštiti od selskuga ogovarajna i potpikavana. Iste mi je poviedala, da se radi zemle i mejašov nigdar nie vredne z nekim natezati. Saki bu od nas dobil svoja dva metra da mu dojde negve vrieme.

Najvažneša tekovina šteru sem od babice svoje dobila, bila je lubav. Lubav prema semu kaj me okružuje, bilkam, živine, spram sebe iste. Iste tak lubav prema našemu govoru, te naše drage kajkavščine. Tak da s pravem morem reči, da ne govorim materinskuga jezika, neg – babičinuga. Mater me tak i tak naviek tirala da se spominam po gospocki. Gdaj me gedek vu Zagreba k sebe pelala, me najpredi upozorila: da prejdeme Mariju Bistricu i v Laza se počneme pljiezati, da si počela po gospocki govoriti…drugač ne bu dobre…neš ti mene sremotila…Pak bi usledil nejni kočijaški jezik. Gdaj se zde na te zmislim, kak je mogla od mene iskati da ja po gospocki govorim, a sama je naviek i jedine znala tie kočijaški govor.

O tem i takvem materinskem jeziku nemam zbilam kaj lepega za reči. Skerem bi rekla ni o matere. Mogla bi konstatierati da me nije rada imiela, nu, rada me je bila.

Viš, zanimliv je te podatek, bar mene. Vladek je iste tak imel svoju babicu Tereziju, štera ga je odgajala, čuvala od sieh zala i napasti. I iste tak jenu mater štera je još dalše prešla, vu Švicu. Po tem sme slični. Nu, imel je on i svojuga deda Pavla. Šteri je iste bil pun živlenjskih mudrosti. Tak ga je več od malih nuog navčil da su si ludie pod kuožu jednak kervavi. Da je bil male starejši, mi je priznal v poverejnu da ga je dedek Pavel navščil još jenu važnu stvar: poklem jebajna nema kajanja. Male proste zvuči, nu tak je kak je. Tuo je neumitni životni fakt. Zdej sem pak i uplela vu naše putovajne i naše babice. Tega sem baš i nie štela, nek mi je same tak došle. Mi se vidi, da sem jim triebala vu vem času dati pruostora. Se kej jesme, kej sme bili i bume moreme i Vladek i ja nim zafaliti. Pak, fala jim. Jezušek, aj sem se respekmiezila.

Ideme dale. Gdaj sem Vladeka vlovila bile je te čist pri izlazu staruga grada na bregu, pri parkingu. Tak se fejst od mene distancieral da nej još šteruga ojera fasuval. Naj mu bu, i tak sem ga male preveč oplačkala. Pet minut sem se sejene fujnila, tek tulike da mu dam na znajne da mi je povredil nežne žejnske osečaje. Je, nekakpak, i da bu tuo sejene tegdanegda platil.

Zde se triebale skoncentrierati na vožnu. Točnejše, na iskajne onuga izlaza na avtoput. Kaj mene posebne pri Vladeku nerviera, naviek me tira da z nim vozim. Da sem ja štiela voziti, bi položila vozački ispit, ne? Ovak mi naviek mozga masiera i nemre me pustiti da v miru buožem lučem okolnu lepotu. Mouram mu čitati i prevajati vraže napise i se jene fulja na sakem križajnu. Poklem pervuga uzaludnuga kruga vu krug, sem mu savetuvala da sejne privpita za saveta i puta gospoju Helgu, našu navigatorjicu. Me poslušal, stal je vu jenu stranputicu, pak navijal, zadaval pitana i molbe, a Helgica je ostala niema, same se vertela nekašna antena i na švapskem mu poručala: Momentan haben wir keine Verbindung.. . Misljim da se Helga još najnega funjila kaj ju je onak kervnički ušutkal pri dolasku. Niti da bi reč rekla. Vladek je zgubil sterplejne, potsetil me na moju mater po nem kočijaškem govoru, pak vužgal po gasu. Mene je pervi put serčece v gače opale. Sreču vu nesreči, na par metri dalše bil je gospon vu uniforme. Nigdar mi ne drajši bil ni jen miljek nek te talijanski, karabinier. Vladek je nega pital aj govori engleščinu ili nemščinu, a karabiner, školovani, je nega pital aj govori frančeski. Meni su se čube počele natezati vu smeha, ali sem jih berže bolše uozbilila, pak se vu sebe smejala kak bedača na nedelu. Onda su nastavili nih dva razgovora z persti i rukah. Kak se činile, gospon školovani karabinier je uluđene Vladeka uputil spram Perugie – deset kilometri, pak na lieve. Vladek se iste uluđene zafalil, vužgal makinu i brrrr…vu krivem smeru. Morti i ne bil krivi. Vladek je silu štel vu Rim. Jer iza pervuga zavoja se pojavil poznati napis: Foglio – Roma. Moja samekuontruola je zliehala, počela sem kipeti od smeha. Kak mošt da ga flašu prečverste štuplinem zapreš… Po ne znam šteri sem se pudek uverila: si puti vodiju vu Rim. Vladek takaj. Nie mi se vidle da mu se te dopada. Čist suprotne temu, negvuga kočijaškuga repertoara i moja bi se stara – posramela. Tuj sem prekipela skruoznaskruoz. Pak da nej vu smeha prasnula, sem se počela najnega drapati: Daj vužgi zde tu Helgu, i vuozi spram Peruđe, pizdatisenanousnateknula. Tuo je deluvale. Našel je skretajne točne tam gde mu je Školuvani i rekel da je. Daj sme zagledali napis Cesena – Padova, znali sme da dobre vozime. Gliboke vu sebe sem se sejene vnaprej veselela sledeče Vladekove stranputice. Nes napustila nadu niti da bu još šteri napis i skretajne za Rim osvanul. Čist onak, da nam rezbije monotoniju vožne. Nis se duge veselila. Te avtoput je tega dena bil pun avti. Talijani na ceste, bešte,bešte,bešte. Prikeljila sem obaplavaoka za cestu pred nami, a serce mi je zgrabila čelična šaka strave. Nes mogla veruvati, kak da slaloma vozime. Naposletku sem skužierala da je i Helga pregovorila, fort je ponavljala: Achtung, achtung. Pažna, pažna. Poklem jene vure ahtungov, skužierala sem da Helgica ne upozorava Vladeka na druge vozače, neg na negvu prenaglu vožnu. Vraži je Vladek vozil kak nor, de dozvolena berzina 100 on dere 140. de dozvolena, 120 on 160. Skužierala sem ja da je nega vlovil te talijanski virus: neš ti mene pretekel, bum ja tebe. Kak sem gedek čverste mogla, sem z desnu ruku stiskala deržača, dek mi ruka ne zadervenela, pak onda laket, pak sem naposletku i cela zadervenela. Tak je bile i bolše. Več nis nič osečala, ni straha, ni stravu, ni berzinu, same sem osečala da sem dervena. Z debeluga iskustva, znala sem da se nikak ne smem upustiti vu prigovarajne, jerbo to navek izazove kontraefekta. Zate sem tak dervena mudre čkomela do pervoga poseta sanitarnomu čvuoru. Uonda me je čul: ti prasecgerdi, očeš nas fundati. Očeš da nam deca siromačeki ostaneju. Kam ti se tak jake vu tu vukojebinu žuri? Če tak nastaviš ne bume tam nigdar dešli, nek buš vu peklu zaveršil, a mene se vu tega raja nikak same neče, čula sem da je jake dosadne. Kakvuga sem bedastuga odgovorja na se te prigovorje dobila? Štel je nadoknaditi razliku od vure cajta kaj je zgubil pri iskanju izlaza. Jahki ti razlog, rit si z nim obriši. Če mi zde i ovde ne obečaš da buš poliehko i pometne vuozil, ja dalše s tuobu nejdem, če trieba idem stopierati, vu suprotnem smeru, s čiem dalše od takvuga bedaka. S tešku muku je obečal da bu pametnejše vozil. Tak je i bile. Tegda negda, Helgica bi sejeno rekla: Achtung. Ja bi ga same prekorne na te pogledala, a on bi smajnil. Oko nas su sejeno norili.Več sme i rihtunga spram Bolonje prešli, i osvajali cestu spram Milana. Okoli nas su se se jače i gušče natekali avti i kamijoni. Nesi znal šteri su noreši, kamijonđije aj pak te vraži fijati. Brenči, zvera levedesne, nigdar ne znaš kaj bu onie pred nami izvel. Achtung, achtung. Mama mia, od straha sem počela po talijanski poviedati. Zvučale je tuo ovak: Ma vidi karo svi ti vinogradi i vocnaki uz autostrada.

Qe belo, skupe pare od bencina, pa dojdu u Svicera, pa postanu dobra roba, fina roba, bio grozce, bio sliva. Ma bio, bio ti nekad bio. E karo, mislis da ne znam da si opet prebrza vozna pocela. Ti stupido uno, sta mislis da vozis na trka u Monca? Ne budes daleko dosao, oce malo u pakao?

Moje su bedastuoce Vladeku popravile raspolozejne tak fejst da se i z Helgicu začel znuovič spominati. Duo zde se naviek same z nju svadil i kudil ju. Zde se začel šaliti. Gdaj godek bi ona zgovorila Achtung, Vladek bi zvaljal kakvuga biserja. Tak je šarmieral Helgicu, da je nastavila žlabrati svojuga ahtunga i gdaj sme spuknuli žnjoru i zaperli ju v škatulu. Ona je znutraj veselo i dalše, tek tulike da zname da je z nami, prigušenuga glasa piskala: achtung, achtung. Tuo je pri nas zezvale nuove hince i bedastuoče. Tak sme vu veselemu raspoložejnu konačne sprešli i granicu i vušli na siguren i poznati nam teritorij – Švicu. Pri Chiasu sme stali da si male nogice pretegneme i friške merzle vodice kupime. Kakva je tuo čistuoča, se kak po špagice zrihtane i posložene. Vu sanitarnem čvuoru, ne znaš šteri gumb za ke služi, zvučnika čuješ švapski šlager… Mam mi je mučnina pri želucu nastala. Na kase je Vladek stručne proučil tetovažu dvajstineke liet stare maloletnice. Kaj je zezvale pri mene negodovajne. Vujne sem si jenu vužgala i z puni pluča potegnula, da jih male prečistim. Vu tem tega je prihajala nekakva besna makina. Z ne je vun zišel švercer same takev, ne mreš ga fuljati. Kamuflieral se z dugi zalizani lasmi i černi očala. Vladek je strusil otrovnoga komentarja: Vidi ga kakev je, taj šverca sve žive, i žene i novce i drogu… ja sem ga ozbilno pogledala pak rekla z talijanskem naglaskem: a ne, samo decu. Vu tem sem času skužierala da gljih krej nas stojiju troje, po glasu sem mam znala – z Bosne. Zemlo otpri se, sem se pokrila z vuhima i bez reči pobegla vu avto. Baš sem muorala se tak osramotiti pred naših ludemi. Ta moja jezičina, tulike me pudek osramotila, a još ju nes ukrotila. Poklem te blamaže, sem se prepustila lepote kraja, a Vladek je pazil na cestu. Prestal je noriti, a kak se vidle i drugi vozači su čist normalne peljali. Mogla se se konačne – opustiti.

Najempudek tam negde poklem Ticina, sem čula kak Vladek mermori: ti mafijaš jeden, lopuža ruska, kaj se špinčiš s tiem jaguarjem, ideš prat peneze? Još tega nie do kraja zguovuoril, a jaguar vruuum, ravne z prednim krajem na nas. Vraži mafijaš, da Vladek ne začvrljil bremzu, bi nas pobral sam tak. Pak se ti prepusti laguodne vožne. Gljih sem zgubila nerve. Počela nad nem kričati, kaj si lubomoren na mutavce z jauguarjem, bolše da glediš kak voziš. Skrušene se pepelem posiplem, zbilam sem od straha počela kričati. Tuj sem skužierala da su mi nervi fejst prenapeti, pak sem zaperla oči i poiskala spasa vu meditacije. Pervih pet minut mi je mantra slabe pomagala, se vidle da sem kak puška napeta. Onda je došel mir, a mene je glava klimala sim tam. Tak sme prešli San Bernardino, a da nes ni primetila. Nes vidla ni navodne sunčece presvetle kaj se z obloki hincalo. O tem me Vladek izvestil poklem. Gdaj sem pak ja oči otprla, okoli nas bila je sama megla. Vlekla se okoli, po bregi kak lena splaha. Se je obmotala, zgutala, pak sem se splašila da sem konačne zaglibela, da sem vu tega čistilišča dospela. Mi se i sveti Peter počel priviđati, kak mi z kažiprstem nekak negodujuči preti. Nevesele. Sprešla me nekakšna zimlica i vsa sem se vu se uvlekla. Nes čak vole imela Vladeka haltati da si jenu vužgem. On je pak počel po gasu preveč stiskati. Se je jače i kašlal. Kak da mu je megla vu požerake zešla. Čisti stravič. Još i ta Helga: Achtung, achtung. Najrajši bi ju z tega satelita hitila vun.

Prešli sme Chura i faljele nam je još dvajst kilometri do duoma. Sramim se priznati, gdaj sem vidla se one oblake kaj su pritsnuli brege i hiže po njih, nes imela preveč veselja. Gda god je Vladek zakašlal, mene se serčeke stisle. Kosti su me zaboljele, potsetile me da sem živa, i da mi va klima nikak ne štima.

Šaanerski trokut nas je čakal. Nič se nie zmenil od pred deset dane. I dalše su okoli njega avti perdeli, po okolni birtija, makar je bile zima, ljudi su sedeli i premietali z šuplega vu prazne, z turkiše restoran pod nami i dalše je dišale na kebab i luk… se po starem. Se jene, gdaj se se zbroji i oduzme, bile mi je drage kaj sem pak tuj. Mam sem vteknula žnuoru od svojuga kompača vu zida, utipkala http://www.hrt.hr i poiskala Sleme. Joooj, kak mi je tuo falele. Dele, vu ne fuste guste, nis mogla vloviti tega draguga vala jer nie bile signala. Deset dane sem zbilam živela vu posvemašne komunikacijske izolacije. Z mobačem sem hodila po dvorišču kak stekla, sake jutre i iskala jenu, same jenu certicu da mi da znaka da se morem ščeri hjaviti. Lepe ti je vu te divle prirode, saka čast i zvezdam i kmice i ščuricem ke ščuraju kak v raju, doma je se jene lepše. Makar duom bil i vu te Kneževine, kaj ju ja odmilja Vukojebina zuovem.

Kak prava rojena Zagorka, sem nam za večerju skuhala i juhicu. Nie bila domača. Bila je orijentalna hot i spajsi v iste vreme, z dugi zviti riezanci kaj se niesu šteli zravnati ni da su se skuhali. Za bolšuga okusa sem zericu Vegete dodala, bez štere nikam i nigder na svetu nejdem – z vegietu se bolše kuha. Poserkali sme ju pobožne kak buokci pri svete Klare.

Poklem si je Vladek nadošel, pak se prištekal. Ne na moj izvor inteligencije, neg na interneta. Pak je tam neke duge iskal, ne znam aj je kaj našel, izem virusa. Ja sem poiskala na jutjubu pravuga domačega filma i tak sem zaspala. Pred očmi mi se vrtela – spirala.

KRAJ