Gnadečki stolec

Ženule su me vručine i mrzline
Od stvareh i okoline
Strte čaše, krpe suhe
Jezuešvo lice štrči z juhe
Te večerje strašlive
Kolica kaj imaju ketače krive
Krive čonte vire z hrane
Se stvari su ali dobre ali ne

I gnadečki stolec čeka me
I kak da glava mi se žge
I jako štel bi ve
Da merenju istine bu konec.
Joko za joko
I kleh za kleh
Istinu sem rekel, to ni greh
Hmreti se ne bojim jako.

Znaki i liste tumačeni
Črlena megla, klehi začrnjeni
Zidi strašni, najgorši v kmici
Oni su betežni zadah v mojoj košnici

Čul sem priče iz samice
Kak se Jezuš rodil vu jaslice
I  kak neki stranec zavit v krpice
Hmrl na drvenom križu
I ak morem reči to zgledi kak dobra stvar
Na koncu konca on bil je stolar
Bar tak mi je rečeno.

Moja dobra roka stetovirala je
bratovu pesnicu H.U.D.I. več
Tih posrancev pet! Nisu na to rekli ni reč

Klupa nebeska od zlata,  napravljena
Škrinja zavetna, pospravljena
O’tam, takva reč nam je rečena,
Cela hištorija je izvedena
Tu doli pak sve je od drota i dreva
Moje telo vu jognju seva
I Bog dalko nigdar ni

Mojoj vubijalskoj ruki ime je H.U.D.I
Koli nje girtel na njem piše D.O.B.E.R
Te potrpljujuče verige
Puntarsku su krv zledile

Vu gnadečki stolec sam splezil
Glava gola na žicu priheftana
I kak metul sem koji išče
Svetlost kaj još negde blišče
Z života se bum ja odvlekel
Da smert mi da skrovišče
A nigdar ja laž nisem rekel

Gnadečki stolec čeka ve
I zgledi da glava mi se žge
I jako štel bi ve
Da merenju istine bu konec.
Joko za joči
I zube za zube
Jer ja velim istine grube
Hmrl bum, ništ me ne koči.

Gnadečki se stolec pali
Zgledi da glava se žari
I nekšu nadu još imel bi
Da vaganja istine bu konec
Joko za joči
I zube za zube
Jer ja velim istine grube
Hmrl bum, ništ me ne koči.

Gnadečki se stolec žari
Z moje glave se pari
I išče neke nade je
Da bu neveruvačkih zgledov konec.
Oko za oko
Zub za zuba
Dokaza ne bu več sa suda
A motiv doli je gliboko

Gnadečki stolec se dimi
Moja glava se topi
I ja bi ve pomogel
Da tom fkanjuvanju bu konec
Čalar za čalar
Istina za istinu
Zgubiti morem još samo zgubinu
Hmreti mi je kakti dar.

Imbra Zbelavski

Doli se legni Imbra Zbelavski
I celu noč budi pri meni
Jer na celemu svetu takve ženske ni
Kaj par bila bi meni
I veter je hučil i veter je bučil
Huji huji ha
huji huji hi
Ftič je na te zletel Imbra Zbelavski
Ne bum se legnul i nečem se leči
Kaj celu noč bil bi kraj tebe
Jer onu kaj me čaka, vu zelenem kraju
Imam rad više neg tebe
I veter je hučil i veter je bučil
Huji huji ha
huji huji hi
Ftič je na te zletel Imbra Zbelavski
Na drvenu lesu se je nagnula
Kaj  bi ga kušlec nafehtala
V roke je zela mesarskoga noža
I čreva mu rasporila
I veter je zakričal i veter je zajafkal
Huji huji ha
huji huji hi
Ftič je na te zletel Imbra Zbelavski

Zemi ga z svojim rokami belim
Za noge ga mertve zemi
I hiti ga noter v gliboki zdenec
Gliboki, kmični, ledeni
I veter je hučil i veter je bučil
Huji huji ha
huji huji hi
Ftič je na te zletel Imbra Zbelavski
Ve leži tu Imbra Zbelavski
Dok meso ti z kosti ne zajde
Ta kaj te čaka  vu tom zelenem kraju
Od čakanja ne bu imela vajde
I veter je hučil i veter je jafkal
Huji huji ha
huji huji hi
Ftič je na te zletel Imbra Zbelavski

(Prepjev na kajkavski: Tomislav Pletenac)