Dan od Svetog Mikule u našemen je mistu najlipji i najvažniji od svih dana, a to je radi tega, jer je Sveti Mikula patron našega mista. To znači da nas on čuva i ča god da bude mi moremo bit mirni. Samo mu triba zazvat ime, i sve će izać na dobro.
Mama i baba činu svečani obid, jerbo nan uvik dojde kogod od rodbine u vižite. Imamo lipu juvu sa cancarelama, pohanu kokoš, pa mramorni kolač koji mama napuni kremom, babine pršurate sa suvin grozjen, a poslin obida svi piju crnu kafu. Ali prije nego ćemo poć ručat, svi gremo u crikvu počastit sveca.
Dok se penjemo uzbrdo, jer crikva je na vrj mista i triba po ure da se dojde gori, baba me čvrsto drži za ruku.
„Mala si, pa moran pazit da mi te ne odnese u more“, govori, “jer ko bi te škapula po ovome vitru?“ Puše da borovi u đardinu škripe a vapor iz Splita već tri dana ni moga arivat, pa nan svi gosti neće ni doć.
Don Ante u crikvi dugo govori, pa se onda piva, pa jopet govori.
Vonjadu šterike i tamjan dok s oltara skidaju veliki kip, pa ga nose vanka u procesjun oko crikve, da Sveti Mikula blagoslovi more. Da se naši mornari sritno vrate i da u mistu bude sloge i napretka, a to će mi dide poslin rastumačit ča znači. Sva se tresen od zime, dok se vraćamo doma, pa me malo nosi mama, a malo baba.
U kući je teplo ka u raju i sve je lipo uređeno: obid skuvan, sve oprano i izmeteno. Njih dvi još su jučer donile drva i vode, tako da danas nigdi ne treba ić, pa cilo popodne samo guštamo. Pridvečer se gosti spremaju poć ća, a dide i ja gremo ih ispratit. Prid Braskom kućom na kantunu skupili se Maslinčani pa pivaju „Oj violo, oj violo, kraj vode studene, draga dušo, draga dušo spomen se o mene“, i „Tulipan, jorgovan, to su cvita dva“ i još razne druge lipe pisme. Volila bi ih slušat, da samo ni tako zima.
Doma su mama i baba oprale sude i lipo uredile kužinu, pa side, a prid svakon bićerin prošeka.
„Neka nas dvi u miru popijemo, oli smo mali posal danas učinile?“, govori baba, a dide odgovara: „A kad je tako, dajte onda i meni jedan.“
„Nego, mišu didov, jesi li išla vidit ča ti je Sveti Mikula donija? Pari mi se da je doli na kantunalu kraj babine posteje niki ka dar? A more bit je to ništo za me?“
Nije ni reka do kraja, a već letin skalama na donji pod, pa vičen:“ Bija je! Baba! Dide! Bija je Sveti Mikula!“
S obe ruke čvrsto stiskan veliki paket i žurin da čim prije vidin ča je unutra.
A kad tamo: naranče, slikovnica, keksi, karamele. I lipi modri pulover, i teple štramplice! Plešen po kužini od sriće.
„Kako je lipo da Sveti Mikula more po svakome vrimenu doć, i ne triba mu vapor! I donija mi je sve ono ča najviše volin!” govorin i stavjan karamelu u usta. “A baba, di Sveti Mikula zapravo živi?”
„Oli nisi danas vidila, šempjo! Pa, zna se, na našemun otoku!“
radio gornji grad 
