Piše: Aleksandar Horvat

Florijan Andrašec je z Dekanovca v Međimurju. Dok prebiram po medmrežju se v kojekaj zabušim i zeznam, a evo kaj sam denes skopal. Gospon Andrašec je bil hrvatski pučki vitiznanec i melograf, rodil se je 1888. kak drugi od devetero dece, a hmrl 1962.  V prvomu svetskomu ratu je bil ranjeni. Njegovoga dara za umetnost je spazil etnomuzikolog Vinko Žganec i naputil ga kaj se v Celju zvučil za orguljaša.

V svojemu Dekanovcu je tak bil orguljaš, kantor, zborovođa, koreograf, a vudril je i fundamenta za limenu glazbu kojoj je potlam bil kapelnik, osnoval je i crkvenoga zbora, Ogranka “Seljačke sloge”, tamburaše i Dobrovoljno vatrogasno društvo. Dok je bil fraj, je delal na polju, zmišlaval nove stvari i patente (na priliku, prešu i sijačicu), plel je košare, delal bačve, rezbaril, klesal kamena (i napravil čak celoga oltara), komponeral glazbu i pisal. Pisal je pesme i za života objavil samo jednu jedinu knjigu, “Međimurske fijolice”, davnoga 1953. leta. Zato ga se denes drži za jenoga začetnikov moderne hrvatske lirike i kajkavske popevke. Ove knjige još ima kolko se na prste more prebrojiti, v glavnem po knjižnicama. Pisal je Florijan i pripovesti, novinske članke i pučke kolendare, a jako je vreden bil v bileženju narodnih običajov, pak je zapisal prek tristo međimurskih popevki. Poznato je da je večinu toga kaj je napravil ostalo v rukopisu.

Florijan Andrašec je za sobom ostavil jako širokoga i svetloga traga, zato se v Dekanovcu z njim jako štimaju kajti je svojim životom i delom zadužil celo Međimurje i širše, pak zakaj ga ne bi štimali i mi.

DEKANOVSKO GRUOBIČE

Dekanovsko gruobiče na četiri strani
Daj bi mene mladog zakopali
na tiem liepim dekanovskom gruobiču!

Sadite, puce ružice, na mom gruobu cvietiče!
Na sredini gruoba posadite,
Drage puce, same biele ljiljane!

Berite, puce ružice, z mega gruoba cvietiče,
Samo onog bielog lilijana
Najte puce z mega gruoba trgati!

Ono bielo cvietiče mej za uspomenu
Štiero su mi šaj, haj zasadile
Same liepe dekanovske pucice.

ČREZ ŠUMU

Lepo je iti
I vreme trošiti
Črez šumicu gustu i zeleni gaj.
A šumski matuli
Su pevat me čuli
I čekaju budni, da dojdem nazaj.

A več pot po noči
Vu mirnoj tihoči
Da grmje zadrema i cvetje zaspi,
Sve tiho je bilo
Kak daj se kam skrilo,
Sam ftiček slaviček se negda zbudi.

Tak kmična je steza,
Sam vidi se breza,
Kaj jena se kora tek malo beli,
A listje zeleno
I svržje tak leno,
Prepuno je rose na stezu visi.

I čuje se nekaj!
Kaj, nešči me čeka?
Tam svečica mala pomali gori,
Sim tam se zdiže
I ide se bliže
I vidi se nekak, da se žari.

Na kraju iz šume,
Več vupre se vu me
Trak svečice male, ka dalko je tam,
Iz lužice one
Se traki sim gone,
A što ju je vužgal, to dobro ja znam.

A kaj se to čuje:
Kak detel nam kluje?
A svečica mala, tam mirno stoji,
Obločec ne mica
A vuni je kmica
A morti i nešči črez jega gledi.

Se bliže i bliže
Se svečica zdiže…
I bole se vidi, ar blizu je več.
I neda si mira,
Obloček otpira,
Sam: “Lefka ti nočka!” se čula je reč.

(Medjimurske fijolice, 1953)