Vinko Kos se rodil vu Vučetincu, kraj Svetoga Jurja na Bregu, 1914. Bil je hrvatski književnik, vitiznanec, a pisal je i za decu. Hmrl je 1945. v blizini Celovca (Klagenfurta), 1945. jeni veliju v štali od tifusa, a jeni da je skončal v Blajburgu. Ne zna se gde mu je grob. Prebrskal sam po medmrežju i našel nekaj i o njemu.

Školati se počel v rodnomu mestu. Vu vekše škole je odišel zahvaljujuči pučkomu pesniku Stjepanu Horvatu z Sv. Jurja na Bregu. Vinko ga je zval svojim dobrotvorom, kajti je za vreme školanja bil baš bogec. Išel je vu  franjevačku gimnaziju vu Varaždinu i Bogosloviju v Škofji Loki. V Zagrebu je maturiral 1940. v klasičnoj gimnaziji. Od jeseni, 1940. godine studira hrvatski i nemački jezik na Filozofskomu fakultetu.

Surađival je z novinama:  Luč, Hrvatska prosvjeta, Hrvatska revija, Hrvatska straža, Hrvatsko jedinstvo, Obitelj, Glasniku sv. Ante, Hrvatska smotra, Hrvatski ženski list, Omladina, Seljačka omladina, Jutarnji list, Morgenblatt, Plava revija, kolendar Danica, Hrvatska mladost, Hrvatska misao, Hrvatski godišnjak i drugi.

Od malena je pisal pesme, kak gimnazijalec v đačkomu listu Zora 1932., a prva mu se pesnička zbirka zvala Vodopad. Prevađal je Rilkea, Tagorea, Verlainea, Eminescua, a  njegove su pjesme prevađane na talijanski, nemački, španjolski i rumunjski.

Njegova pesma Domovina se, kak pišeju, lefko more meriti z  Mihanovićevom Hrvatskom domovinom, a pesma o Međimurju ne zaostaje z prevzvišenim čuvstvima. Zarad zavičajnoga kajkavskoga, vsa je puna živlenja. Vinku Kosu se rodni kraj vrasel v srce, on čez pesmu diše. Njegova Lada veli: Dečica moja zemlje ljubljene / z oblakov i sunca ja vas gledim / Otpri se bombrek, rascveti se cvetje! / Daruvati zemlju vsim blagom želim.

Virtuoz reči, puno je napisanoga posvetil deci, a nalepše su Božićne zvjezdice i Dušenka. Za decu je pisal pod imenom Čiča Nika i zato su ga deca mela rad. Najvažneša zbirka poezije mu je Lada (1944.), a za koju je dobil nagradu grada Zagreba. Na poticaj Stepinca počel se baviti pedagogijom: napravil je program dečje lektire.

V njegovo vreme ga nisu baš štimali zarad poezije kaj je bila religijska i ćudoredno nadahnuta. Nije radi toga bil zabranjeni, ali je bil zatajeni, njegovo se delo ni moglo najti v službeni književni, obrazovni i antologijski formi. Napisal je: Vodopad (1939.), Kipar (1941.), Božićne zvjezdice (1941.), Zlatna jabuka (1942.), Dušenka (1943.), Šišmiš (1943.), Divlji dječak (1943.), Lada (1944.), Planinski dječak (1945.), Zlatni orasi (posmrtno u Torontu 1967., koju je izdao Lucijan Kordić), Sabrana djela 1-2 (Čakovec 1997.)

Uglazbljene pjesme: Dom (Jakov Gotovac), Cmreki v snegu spiju (I. Sokač), Ljubav (Lada Kos), Veter (Lada Kos).

Pak evo onda i poar njegovih, za spomenek.

LADA

Bela Lada cvetje nosi,
ide k nam z otoka,
protuletje tu je drago,
hertar z bičom poka.
Protuletje, protuletje,
drage tople vure,
svoje popke su odprle
vrbe polek Mure!

(Lada, 1944.)

MEĐIMURJE

Jablani kraj ceste. Selo.
Ljudi. Ravnice.
Koruze, slogi, meja do meje,
senokoše, brežanjki, gorice.
Drava, vrbe, Trnava, Mura, bereki,
šume, gmajne, ceste i kolniki.
Čakovec, Prelog, međimurski sir.
Teliči, pajceki, konji, krave i biki.
Šandari, opčina, štacuni.
Cirkva, plebanuš, farof i škola.
Mužika v krčmi. Tanec.
Popevka, huškanje i dobra volja.

(Lada, 1944.)

VETER

Vuni pod mojim oblokom
veter se plače, šumi,
zakaj si tožen, moj veter,
žalost poveč mi ti.
Tvoju sem zemlju preletel,
vu njoj te videti ni,
bregi spitavleju za te,
tožno klopotec brni.
Veter, moj veter šumeči,
ti se obrni nazaj,
vsakomu cvetu i bregu
srca del mojega daj!

(Lada, 1944.)

CMREKI V SNEGU SPIJU

Cmreki v snegu spiju,
ftičic čuti ni,
k nam pod strehu dojdi,Ž
mali Jezuš ti.
V zlatu i srebrini,
bor se ves blišči,
k nam pod strehu dojdi,
mali Jezuš ti.
Srce je betežno,
vu njem sreče ni,
zvračiti ga moreš,
mali Jezuš ti.
Sveta noč je tiha,
mali Jezuš ti,
v našu hižu dojdi,
čakamo te mi.

(Lada, 1944.)