Rodil se je v Zagrebu 1898., v Zagrebu je i hmrl 1976. Znanje je pridobival na Višem gospodarskom vučilištu v Križevcima i na Filozofskomu fakultetu V Zagrebu. Bil je vučitel v Međimurju, Podravini i v Zagrebu. Od 1950. je tajnik Matice hrvatske. Kak sam čul za njega sam išel malo prekapat po spisima kaj su se poskrivali po mreži. I evo kaj zanimlivoga ima o Mikuli.

Hrvatski kritičar i esejist dr. Bartolić ga zove “pesnikom međimurskog kraja”, i “međimurskim bardom”. Za njega se čuje i kak “zagrebačkoga navučitela Mikulu Pavića”

I deda i japa su mu takaj pisali, tak da je Mikula familijarno bil baš kak rojeni za to. Makar je od početka pisal štokavski, najbole ga znamo po njegovi zavičajni liriki koji se posvetil dok je došel za vučitela v Međimurje. Veliju da ga se v kajkavski poeziji more deti v red z drugima preštimanima kajkavcima v dvadesetom stoletju: z Galovičem, Domjaničem, Krležom, i Kovačičem.

Pesme su mu se prevađale na mađarski, ruski, talijanski i nemački, a i on je sam prevel kakvih deset pesmi mađarskih pesnikov.

Prva zbirka mu je bila na štokavskomu “Lirika” (1920. leta). Na kajkavskomu je napisal zbirke “Pozableno cvetje” (1923.), “Popevke” (1940.), “Međimurska zemlja” (1951.), “Zvira voda” (1957.) i “Prsten zvenknul” (1968.) Napisal je i pesme za decu “Zlatni orasi” (1924.), “Zvjezdano jezero” (1925.) i “Čudnovata školjka” (1930.), 1 1968. objavil je “Antologiju novije kajkavske lirike”.

A evo i malo njegovoga originalnoga međimurskoga z njegove najpoznateše zbirke “Prsten zvenknul” z 1968. leta::

MEĐIMURSKA

Da je z čistog vina morje
pak da je kak Međimorje
lefko bi ga spil,
al bi za njim išče plakal,
sivim sozam brk namakal,
žalosten bi bil.

Da z orsagov celog sveta
zbereju se dekle cvetja
najlepšeg na kup,
itak bu mi ona lepša
neg med njimi i najlepša,
neg se lepe skup.

Gda bi imel črne konje
vozil bi se ofčas do nje,
pred hižom joj stal,
hintov bi zastavil z mukom,
brk potegnul gori z rukom,
jabuku joj dal.

Je, al toga sega nema.
Gleč, birtaš mi stola sprema,
vu noč moram it:
zlemal bum joj gavalera
spoleg kog me otec tera
– pak pem drugam pit.

KRISTUŠI

Na kraju sela križa su zdigli
pred dosti leta pobožni muži,
Novi je Kristuš visok, ves zlaten
zvrh sela z okom kaj  golob kružil.

Došli su vihri, tuče i dežđi,
sprali mu lice, zrovali telo,
Se je ve bilo kak slabo leto,
žalosno,bogo, ne več veselo.

Ostal je beteg i leta gladna,
križ prazen, koga čavli boliju,
Kristuš je ž njega med muže zišel,
kaj mu na spodob spodi stojiju.

KIPEC

Moji mali hiži
v mesecu se zlati
kakti glava sveca
krovek joj slamnati.

Koli nje se šeče
črez ževično granje
veter zgorec stiha
kak da plete tkanje.

A spod trave mefke
cvrčka sara žula,
pak peva popevke
kak pavič mikula.

ZADNJA POPEVKA

K meni, stari vi pajdáši,
pesmu moju, mužikaši!
To jedino još se more,
to mi nišči zet ne more,
drugo — kaj i znam.

Zdavnja se sem zgubil drugo
ne drži me niš za dugo.
Desetača još me tišči,
izda mene mozbit vnišči,
nju vam zato dam.

Igrajte mi za nju stiha,
tak kak mama dete njiha,
kak da nešči groba kopa
v kojega pem se prez popa,
igrajte mi, mam.

Još dve čaše, dve popevke,
i dve bele roke mefke.
Sveču k flaši bum naslonil,
k stolu glavu dol priklonil
pak bum zaspal tam.

A če cimbal me ne zbudi,
samo primeš dale grudi.
Bošle onom koj pod strehu
mrtev opal je vu grehu —
smrt je život s vam,
smrt je živet sam.