O tomu čoveku sam puno toga čul i zeznal. Rodil se je v Novom Virju 1937. a hmrl v Zagrebu 1995. v 58. letu. Novovirovec i v duši veliki Podravec, bil je pesnik, vredni etnograf i majstorski humorist.

Najprvo brojke, a njegove su velike. 1957. je završil gimnaziju v Koprivnici, a njemački i jugoslavenske jezike studiral je na FF Zagreb. V njemačkom je bil pravi majstor. Od 1963. dela v gimnaziji v Đurđevcu, i surađuje v Telegramu, Kulturnom radniku, Podravskom zborniku, Izboru, Feferonu, Paradoksu, Večernjem listu, Ježu, Republiki, Podravskoj grudi, Gospodarskom listu, Modroj lasti, SMIB-u, Maslačku, na radiju i zagrebački televiziji. Bil je urednik prek 30 knjig i zbornikov. Bil je revni istraživač i zapisivač narodnoga kajkavskoga blaga, z čega je napravil prek 100 člankov i prek 2000 radijskih emisiji. Započel je debeloga kajkavskoga rečnika, ali ga je ne uspel završiti, Tonske snimke, pesme, basne, humoreske, aforizmi, pripovetke, eseji, filmski scenariji, novele, epigrami, književe kritike, etnografski članki i zapisi o narodnom blagu, radijske i TV komedije, novinarski članki… se je to za svojega života napravil.

Kcoj još deset stihozbirki vu svoji nakladi, prevedeni je na deset jeziki i ima ga v najmenje deset antologiji. Pisal je i o Galoviču, Miškini, Karlovčanu, kojemu je napravil i sabrana djela. Sam je rekel da ima prek 20.000 četvornih hvati materijala. Dobil je nagradu “Grigor Vitez” za stihozbirku na dijalektu Zagovor zemlji z 1992. Za njega veliju da nema te književne forme ili žanra kojega Dravski ne bi znal napisati. Da nije tak rano hmrl, bi njegovo skupno delo bilo kak nekakva enciklopedija cele Podravine. Tak pripovedaju onu kaj su ga znali.

Zeznal sem da je Dravski prvi zmislil sintagmu Ujedinjeni kajkavski emirati po kojemu se zove poznata Facebook grupa. Makar se denes ne zna točno po kakvomu tekstu Đurđevčani tiraju Legendu o picokima, čujem da je Dravski napisal prvi tekst za tu špelanciju, ali se je autorstvo z vremenom pogubilo med različitim preradama. Hodal je po kajkavskim recitalima i zelinski je rekorder po broju nagradi, denes se v Sv. Ivanu Zelini, na recitalu “Dragutun Domjanić” jena nagrada zove po Dravskom.

Kak pesnik je bil vrh, versifikator, vitiznanec, jako pedanten i spreten z rečima, v svojemu istraživačkomu delu je stare reči spašaval, a dost njih novih skoval po kajkavskim korenima. Kajkavski mu je bil v srcu, a Drava v krvi. Bil je njezin admirant, a svojim je korakima poteracal celu Podravinu, peške. Dok se zbrojimo, Miroslav Dolenec Dravski je bil jeden od najvekših pravih čistokrvnih Podravcov otkak se Panonsko morje povleklo.

Zebral sam i nekaj njegovih kajkavskih versov:

MOJA PODRAVINA

Krov do krova
je narendan –
paprika na koncu!
Lešči mi se Podravina
kak vedrica v soncu.

Čez ravnice,
prek mekot
curi pot
bel
kak bela melja.
Od goric
prek šenic,
prek šikarja
i mrtvic
vdož nuz Dravo pelja.

Diši šuma, diše brazde
korenje i loke.
Prigrinja me kraj moj
k sebi,
kak mamine roke.

Hiža k hiži glavo svojo
prigiblje, prislanja.
Gori v zrnju, švasti v senu,
žveni v znoju,
kipi v grozdju,
trepče moja Podravina
kak krušna struganja!

Tak bi rada,
tak bi rada
mazil lica tvoja!
Tak lepa si kak je čudo,
Podravina moja!

(Zagovor zemlji, 1992)

VREME

Čas po času,
kak konj v kasu
zasiplje se
nekam v mrak.

Čvaplje stija
pak se zvija
okre srca
kakti slak.

Zido zobi
v mladi dobi,
a za časek –
vre si sed.

Denes sinek,
zutra japa,
a prekzutra
vre si ded.

Teče, teče,
pak se vleče.
Hoda stija
kakti pes.

Sim se zgleneš
tam okreneš
i gruđva ti
bobne v les!

(Zagovor zemlji, 1992.)

“Kad te kude, ne pitaj zašto, nego tko. Kad te hvale, ne pitaj tko, nego zašto.” – M. Dolenec Dravski