Aleksandar Horvat: MARIJA NOVAK međimurska vučitelka i etnologinja

Urednikdana11 rujna, 2020/Komentari zatvoreni

Vidim da je meni denes leže skupljati blago nek je negda bilo onima koji su morali iti od hiže do hiže i halositi po starim ormarima i tavanima, prava pitanja postavlati, da bi kakvo znanje na kup deli, premislili o njemu, pak svoje študije dali svetu na oglede. Za Mariju Novak sam guglal po medmrežju dve tri vure i več dosti znam od onoga kaj me zanimalo i kaj mi za ovu priliku treba. Priznam da sam denes v jutro još ne znal za nju. Ali sakoga koji ostavi traga se po tomu tragu more najti i o njemu se informerati

Preštimana Marija Novak se rodila v Međimurju, v Donji Dubravi, 1945. v konzervativnoj i nacionalno osveštenoj familiji, a hmrla je v Kloštar Ivaniću 2015. Bila vučitelka v Osnovni školi v Kotoribi, a potlam od 1983. v Zagrebu v Osnovni školi Dr. Vinka Žganca. V isto vreme dok se bavila z đakima, skorom 40 let, delala baš to kaj sem rekel na početku, rudarila za znanjem, obilazila sela, spominala se z ljudima koji su znali kojekaj o tradiciji, ali i z onima koji su meli takozvanu “povijesnu memoriju”, čitala je kaj god je našla na tu temu i delala skup z onima koji su bili na istomu tragu. I to je rodilo bogatim plodom, dokazala je da su Hrvati prije pokrštavanja imeli svoju kulturu, tradiciju i mitologiju, koja je zišla ze staroperzijske i starogrčke, a ne da su došli kak nekakvi pogubleni rimski plačeniki. Ne bumo vu to išli glibokše, nego… tak je nastala knjiga “Tragom hrvatske mitologije” (Institut za etnologiju i folkloristiku, Zagreb 2007.). Vse ono kaj se bilo napisano o preteklosti i kaj je bilo razhitano na male komade, je Marija v ovu knjigu zebrala na jeden kup i denes je to glavna knjiga za se koji se budu dale na tomu školali. Veliki je to bil posel. Tradicija našega naroda je bila Marijina prva i najvekša strast koju je z velikom voljom celo živlenje mela vu glavi.

Dr. Vinko Žganec je, dok je još bil živ, mel prste vu tem da se Marija pozanimala za folkloristiku i etnologiju, a posebno za folklorni ples. Postala je i članica Društva folklorista Hrvatske, a 1971. leta postala umetnička voditeljica folklora pri Kulturno prosvjetnom društvu Zrinjski v Čakovcu. Našel sam da su tu dogodil umfal, kajti je to Društvo v Kajkavskom kolendaru 1972. objavilo pesmu Željka Sabola “Kad izgovorim tvoje ime Hrvatska”, kaj je vlastima ni bilo po volji pak su dobili političku zabranu.

Živela je bez svoje familije, postiha, bez preveč galame i celi svoj život je dala vu strast preiskavanja hrvatske tradicijske kulture, a posebno međimurske. Puno je o tomu pisala, objavila, držala predavanja i zadužila je Međimurce ze svojim znanjem o narodnim pesmama, plesima, nošnjama… o folkloru na vusko i na široko. Njezina budu dela zanavek ostala Međimurcima na čast, a sima na korist.

V celi ovi štoriji nas zanima i jena druga stvar – ono kaj je doprinesla nažemu dragomu kajkavskomu. A to je isto nekaj kaj vredi jer da ne vredi, ne bu nju naši vrli kajkavski znalci i vučenjaki nameteli v red z najjakšim koji su živeli v njezino vreme. Mladen Kuzmanović v svoji “Antologiji novije kajkavske lirike” (Kaj 3-5, 1975.), od prek četrdeset kajkavcov kaj su v knjigu deti, nju nameče v prvih sedam kakti pjesnikinju “koju si treba dobro zapamtiti” (vuz Zlatka Crneca, Vericu Jačmenicu, Ivu Kalinskoga, Zvonka Kovača, Stanislava Petrovića …).

I Ernest Fišer v svoji antologiji “Dekantacija kajkaviana” (IC “Revija”, Osijek 1981.) Mariju Novak vidi med predvodnikima moderne kajkavske poezije (vuz Vladimira Velčića, Boženu Loborec – za koju čujem da je Mariji bila kakti mentorica,Vericu Jačmenicu, Ivana Horvata, Paju Kanižaja, Stjepana Draganića, Blanku Dovjak Matković, Stjepana Jakševca, Mirka Radušića, Ivicu Jembriha, Melitu Runje, Ivana Kutnjaka …). I na zadnje, bumo još rekli da je bila članica Kajkavskog spravišča gde je vredno kak pčelica donašala meda v domaču kulturnu košnicu v ulogi članice Izdavačkoga saveta časopisa Kaj.

Objavila je zbirku kajkavske poezije “Čestitke i križi” (predgovor – Joža Skok, tisak – TIZ „Zrinski“, Čakovec, 1972.), i to nakon kaj je več bila v nekaj antologiji i objavljivala v Kaju svoju poeziju i priče za decu. Nisem uspel najti kak je zgledala naslovnica. Saki koji se na Mariju zmislil ili kaj navučenoga za nju napisal, je dal do znanja da je bila jena posebna persona, z individualnom notom i pogledom na poeziju.

To bi bilo najkrajše kaj sam za preštimanu versoznanku Mariju Novak našel i za ovu prigodu pokratil, predelal i priredil. Ostaje, da kak i za sakoga, prilepim sim i koju njezinu domaču kajkavsku, tak kaj ji se vsaki čez verse more i v dušu naluknuti.

MEDVENA POGAČA

Skrbna i delatna kakti prava mati,
Švicna i soznata kak z drobnom decom dovica,
Preštimana, tiha gizdava zvezdica.

Z kervavemi žulji sakom stola prestre.
Slatki je njen kruh, ljubaf – zlamenje.
Vanjkošec je mefki, bogate senje.

Tenjke žice tamborice,
Drfteči žganci, duša fijolice.
Zlatno sonce i mesec namigač,
Reč kak z cukorom posoljeni kolač.

Čerljene ruže i plot z vodom spljeteni,
Žoto zrnje i falat nebeskoga neba.
Jen zbor pevača.
Ravnica međimorska – medvena pogača.

JESEN V PRUTULJETJO

Bistri đurđeki
Po grobijo
Široko gljede, gljede
Kaj da iščejo zgubljene sreče.
Spod zbuđene građe fijoljice
Diše, dišeče diše,
Jednako se mrtve mire.
Ljeva pak desna
Po mefkoj travi kljeca.
Glasi se saničica.
Odgovora nega.
Tam malo dalje,
Smrkava se.
Brazde!
Počesane kak snehe
Senjaju žetve.
I makar
Čistom se do hižnoga poceka,
Protuletje z menum koraca
Mi se čini
Da ne doga moja steza!?

TENJA

Grad je v črnini.
Nikoga nema.
Stala se, pogljedala gori,
Njena zvezda je mala,
Tak mala kaj komaj se vidi.
Najempot je vrisnola
Na posteljo opala.
Gljedi, ljudi išče gljedi
Ta tenja od betega
Z bljedemi joči.
Grad je v črnini.
Stala se jena črna tenja,
Hljemba gori-dolji po hiži
Se po menje i menje
Vustaja, vustaja
Jena črna tenja.