Aleksandar Horvat: Mihovil Pavlek – Miškina, seljački pisec i pučki tribun

Urednikdana25 rujna, 2020/Komentari zatvoreni

Mihovil Pavlek, vredni, obični čovek kojemu je čast biti seljak i po kojemu je zemla se kaj čoveku treba – i nagrada, i pokora. Rodil se je v Đelekovcu, v rujnu 1887. leta. Denes ga znamo kak Miškinu, kajti Podravci voliju svoja imena tak povečavati. A če komu takvo povečano ime dobro i zasluženo pripada, onda je to Miškina Pavlekov, veliki i srčani čovek. O njemu medmrežje zna kojekaj, a kojekaj i ne zna. Ali našel sam jenu pohabanu zelenu knjigu gde i Miškina dosti govori o samomu sebi. Tak dober čovek… otporen na se jade i čemere, navek za pravicu i saku drugo ludsku dobrobit. Kak mene Miškina zanima kak pisec-seljak i to v prvem redu kajkavec, bum vu to vuprl svoje premišlavanje, ali sejeno moram makar na kratko poluknuti i v to da ga se drži piscom-političarom.

Miškina je navek bil i navijal za seljaka, a v politiku se naluknul prvi put 1925. leta dok je več imel 38 let. Kak je bilo, bilo je, bil je čisti nepokvareni radičevec, a 1935. je još ozbilneše išel vu politiku kajti je pravdu štel najti i zboriti, a par let potlam, 1942. mu je ta politika zanavek zaprla biležnicu. Oni koji su svedočili njegovomu živlenju veliju da je kak političar navek bil jako svoj. Nesu njemu bili preveč po volji niti ondašnji levi niti desni, kajti je za dobro živlenje po njemu se bilo dobro, ali ne i nasilje. Bunil se je on itekak, kajti je bil srčani, no bil je bister i zalagal se da se se rešava v miru, a seljak i pravica su njemu navek bil na prvem mestu. Tragično je skončal v Jasenovcu makar je i z leve i z desne bilo mišlenja da ga se treba pustiti, pak i denes se veruje da si Miškina to nije zavredil. Kak se ne zna točno kojega se točno dana “nije vrnul” z Jasenovca, v matični knjigi mu se službeno piše da je preminul 30. lipnja 1942. Nigdar nebumo znali. Tolko o politiki.

Miškina je po semu bil jen vreden i skrben čovek. Bil je načitani kajti je v Đelekovcu bila pučka škola, čital je se do čega se je moglo dojti. Ali bilo bi napak reči da mu je živlenje bilo lefko. Čez dan bi se nahrmbal na polju i po gruntu, a po noči bu v štali pri petrolejki ili sveči pisal svoje pesme i priče. Kajti, po pučki školi je Miškina dvajst dve lete živel i spal – v štali. Ovak piše Miškina:

– V štali sem spal kak i druga živina, čak i gorše, jer sem se ja brigal za njih, a za sebe sem se ne mogel. Tu, vu tem smradu i gadu, posebno v noči, dok ne bi mogel zaspati, mislil sem i premišlaval o sudbini, svoji kak i o sudbini stotine drugih ljudi kaj živiju polek mene, počel sem čitati knjižice i novine polek slabe petrolejke, kvaril si oči i pluča, a vjutro, onak zmrvljeni i spotrti, išel bi na svoje delo “na čistomu zraku”…

Vu to vreme je i upoznal Radića tak kaj ga je po skrivečki išel poslušat dok je hodal v selo, pak se z vremenom i vužgal za Radičeve ideje. Miškina sam ze sebe piše da se rodil par dni predi Svetoga Mihalja, onoga kaj je po nebesi pravdu delil, po njemu je kršteni i da zato mora naglas zaviknuti na saku nepravicu. More se reči da je v živlenju na veliko pisal o svojemu zavičaju i o seljačkomu živlenju i socijali, o teškim jutrima i večerima, ali ne jemput bi oplel i po semu kaj seljaku donaša krivicu i kaj ga tlači. A vu pisanju je bil jednak dober kak i pri seljačkomu delu. Pisati je počel v isti oni štali, kak zreli čovek s 32 lete, prvo kaj je igda napisal je bil nekrolog Antunu Radiću. Potpisal ga je z Miškina, i od onda je Miškina ostal. I denes budu mnogi priznali da je znal kaj dela i da je njegovo pero bilo kudikam jakše od mača, jer bil je načitani i informerani, rad je čital Šenou, Kozarca, Preradovića, Novaka, Krležu, Kovačića. Njegova prva knjiga z 1926. leta, “Za svojom zvijezdom”, je tiskana v 100.000 komadov, a vu nji je pozival seljake na slogu, čez svoje priče o selu, o pravici i o nepravici i o tomu kak bi se pošteni radnik i seljak trebal postaviti za svoju sreču i blagostanje. I druge njegove knjige su tak dobro i tečno govorile o selu i problemima v koje je obespravljeno seljačko živlenje zapleteno, da su si čak i v njegovi stranki malo premislili. Od kak se nafčil čitati i pisati, veroval je v reč i v pero – čim se nepravica pokaže treba z perom zamahnuti, naglas, da se čuje i vidi.

Pisal je za brojne novine i glasila: Dom, Evolucija, Hrvatska revija, Hrvatsko selo, Napredak, Napretkova božićna/uskrsna knjiga, Narodno kolo, Razgovor, Republika, Savremenik, Seljačka prosvjeta, Seljačka sloga, Slobodni dom, Varaždinske novosti i druge . Pisal je članke, crtice, osvrte, pripovetke, brošure i pesme. Pisal je na književnomu i zavičajnomu jeziku.

Makar se je morti čistam malo vrgel v Galovića, Krležu i Domjanića, kak i v običnu narodnu liriku, njegova kajkavska poezija je prava domača, zavičajna, a on je kak pisec kompletno samouk. On nikaj nije zmišljaval, njegove pesme su ono kaj se događalo okoli njega, ono kaj je videl i kaj si je premislil, njegove su pesme špigel seljačkoga živlenja ze sim njegovim dobrim i hudim stranama, ono kaj mu je dosti put v štali palo na pamet i kaj je čak v glavi moral čuvati dok bi mu veter sveču zatrnul. Miškina je imel rad živlenje, ljude i delo i to ga je tiralo napri. Dosti se toga v njemu porušilo dok je 1937. zgubil svoju dragu ženu staru 47 let. Kak sam veli, teško je dok zgubiš ženu, a još teže je dok zgubiš i pajdaša koj ti davle snagu za živeti. Napisal je celu zbirku pesmi svoji Marici i te su pesme večinom tak tožne da se vidi kak ju dobri Miškina nigdar i nikak nije mogel prežaliti. V ovi moji pohabani knjigi sem našel četrdeset šest takvih pesmi.

No, da bi ovo moje prelistavanje vrednoga Miškine došlo kraju, kak i za sakoga bum sim priheftal par vrednih kajkavskih koje su z njegove olovke, pod njegovim zasuknjenim mustačom, zagledale svetlo dana.

CUZEKU

Cuzek, cuzek, al bi se rital,
da je tebi ziti van
ze te stare kmične stale,
gde si pavuk prede tran.

Ti bi letel kakti tica
po dvorišču gde je plot,
el’ bi mogel prelo najti,
kaj bi skočil još na pot.

Kak si skakal celo leto,
dok je bilo toplo, prah,
sakoga si kuta nasel,
neje tebe bilo strah.

Tam si rital, praha digal,
srdil cucke saki čas,
vsi su na te viku zdigli,
velki, mali vu jen glas.

Ali ve ti zima ne da,
ti je žmehki oglavnik,
na noge si zapet bogec
kakti da si z gmajna bik.

Al vre dojde nazaj leto,
zraste trava, cvel bo cvet,
ti na pašu onda pojdeš,
onda bode tebi svet.

KRIČALA JE …

Kričala je v poli tica,
drobna, mala prepelica,
kričala za sega grla.

Vse se misli: kaj se zdrla…
V travi si je gnezdo zvila,
notri jajca namestila,
naduvala seje dogo,
srcem grela dnevi fnogo.

Vtiči so se mali zlegli,
s trave glave gore digli,
prosili so nekaj jesti,
poletela je donesti.

Dok je ona hranu brala,
Tičem malim kaj bi dala,
došli jesu kosci v pole,
kosili so brže bole,
kosili so bujnu travu,
pokosili tičem glavu.

SE STEZE NEKAM IDU

Se steze nekam idu,
i po njim se dojde sigdar,
ka steza na groblje pela,
ta ne vrne se nigdar…

Mnogi pot Tebe vu brigi
ja bi ostavit znal,
po stezi nekom sem zginul,
kak da bi me što v kral.

Negda ni zbogom ne sem ti rekel,
al k domo zato vrnul bi se nazaj, –
kajti nigdi ne tak lepo kak doma,
pak makar bi išel svetu na kraj.

Ti jempot ostavila si mene,
i otišla malo na pot,
najti te nigdi nemrem,
iščem te, zovem posod…

Se steze nekam idu,
i po nji se dojde sigdar,
ka steza na groblje pela,
ta ne vrača se nigdar…

PESNIK IN PUNTAR

Betežen sem,
Vmrti bo treba, duša s telom se raziti.
Ma sad pred Boga-stvoritelja iti
Neje me strah –
Jednu sem dušu imel
I obraz jen.
To sem nanašal čez svet
Pono bogečki je let…
Za ništ na svetu nesem ju dal
I v reštu za nju ja sem spal.
Gledela je navek gdje Bogek stoluje,
Koj se zna, i vidi, i čuje.
A ludi kaj reču
čisto je prav – – –
Se je prešlo
I iti bo na pot
duša gori, a telo vu svoj kot.
Križek na nebo gori bo gledel
Slove na njemu rekle bodu pak:
Ovdi počiva bedak
Koj pravicu iskal je za ludi
Halabučil
Za nekoga nekaj i polučil,
Štale i gnoja sam se je vžil
Žohkega pehara ponoput pil
A pesnik i puntar on je bil.