vu noči znad varoša gda smo isklali kmicu na koncu mesta

vu sej našoj norosti gda su nam joči bile vekše od mladosti

z dlanof noči se trusila jesen (vu sobe, na pola, vu nas)

vu čkomini hoste gubile se rieči

vu noči znad varoša gda smo iskali kmicu na koncu mesta

i skrivali se spred svojih korakov splašeni spod zvezdami

gda su vulice bile breskončne srebrne kače

sako malo sme zastali, vužigali cigaretline i

pripovedali svoje kratke žitke megli i cestami kaj su se budile pred nami

vu noči znad varoša gda smo iskali kmicu na koncu mesta

se je več bilo zaprto

i lese i hiže, obloki, škednji, koci, krčme

vu noči znad varoša gda smo iskali kmicu na koncu mesta

nesel sem vu roki tvoje skripte za ispit

(zmislim se sto duš vu iskanju sebe, sto belih senc vu zginutju, vu stopu kaj ih prati

sto duhov splašenih, sto duš nemirnih vu iskanju sebe, na spotrtoj štreki kresnice im hmivaju joči)

vu noči znad varoša gda smo iskali kmicu na koncu mesta

se prek starega sajmišta, stare vage

tam gdi trošne hiže pripovedaju z svojim spucalim fasadami o smislu žitka

a besni cucki se zaletavleju na se živo kaj prejde po cesti

vu grabi na periferiji plašiju se velkih voda drave kaj im je grlila pete

nahereni obloki z kartonom mesto spotrtega stekla skrivleju duhu smerti

znad njih veje hoste pridržavleju meandere zvezdišta

hiža vumetnika na rubu hoste, vu rupi, spod bombellesove štreke skrivle

totem črnega jezuša na plavemu stupu, koprive vu dvorišču

svetišče nepriznanih, odhičenih, raštrojenih, zgublenih

kaj se šunjaju po starim bunkerima polek drave

i skrivleju od svetla, kmice, od sebe, vraga i jezuša vu svojim špiritnim odhajnjima duha vu zemlenim sobami

dopratil sem te do doma pak sem se nazaj vrnul se okoli, polek hiža od stekla z kristalnimi vejami

i metalnim ftičima vu krletkami

varoš spi, bogatuni spiju isto kak i siromaki

vesmir probavla noč kak želva mlade ftiče, nenadoma

vremenski červ spi vu dravskemu pesku več jezero let

ne pomika se

sam ga čuje dravski vodenduh gda se pela znad štreke

nevidlivom bombellesovom lokomativom

vu noči brez meseca gda čuješ kak elektrika struji vu žicam znad tebe

a vrane bejžiju proč prevrčujejuči se vu kmicu

ostaje sam noč, ona črna noč kaj potihe hmira vu molitvi

vu toplini malih hiž

kaj pripovedujejo o odhajanjima i dohajanjima

vu vrtima vu kojima cveta nada

tam gdi ne poslušaju kmicu na koncu mesta brucea springsteena

jer kmica je tam doma