NORHAUZ

vidim te vu nekšnom tvojemu vesmiru
kak vu zahajanju z barokne slike
vu morju svetla gipkega koraka
polehko se pomikaš,
curi noč z škarnicla našeg malega Boga
šumiju kreluti ajngela
parafinske solze na obrazu
dajeju ti nekšnu neodrejenu svetost
kaštiga si mojih senj
odhajaš, vidim vusnice ti se premikavleju
čutim da mi hočeš nekaj reči
se mi zgledi nekak noro
stekleni je nož jutra rasparal den i žuti se
pes vu dvorišču otrgnul z lanca
zarežal je kak besni
nisem te čul od teških zvukof kaj su se zavlekli
vu glavu i pikali me celu noč električnom mužikom
nisem te čul vu burji zvukof
z jutrom su slike vu glavi sprepeglane
i črniju se kak noč vu gozdu, kak zgašeni ekran

negdo je zaružil z haustorom i
rastiral senje

vu skloplenim očima se je črleno
ležim na posteli, sam, vu ancugu
nestali su glasi vu meni
se postaje čkomina,
nemi film, norhauz
vu čekanju eksplozije možđanov