Sončani prsten

Zgašnjeno telo na zemlu položite
od beloga papera kolaž
kak zrezane zvezde nebeske posložite
jena do druge jena na drugu
kak belu dugu vu belomu krugu,
gda buju beli snegi padali.
Naj se prime za saku senku
pjezaž od perine z visine ;
sam z usta bu duša vrela
kak megla z mrzloga tela
tam visoko gore vu oblak otprhnula.
Jena duša šest korakov
jena duša šest zmržnjenih krakov
duša do duše kristal do kristala
svetlost se razleva
oko sonca prsten svetli
vu sred sončanoga dneva
duga – duša , duša – duga
dva sonca nad celim svetom
sončani prsten
sakim letom se vekši i vekši…

sončani prsten – sunčani prsten
(prsten oko sunca – prirodna pojava)

zgašnjeno – ugaslo ; telo – tijelo ; zemlu – zemlju ; papera – papira ; kak – kao ; zrezane – izrezane ; zvezde – zvijezde ; jena – jedna ; belu – bijelu ; vu – u ; belomu – bijelom ; gda buju beli snegi padali – kada će bijeli snjegovi padati ; naj – neka ; se prime – se primi ; senku – sjenku ; perine – blazine od perja ; z visine – s visine ; sam – samo ; z usta – iz usta ; bu – će ; kak – kao ; megla – magla ; z mrzloga – s hladnog ; tela – tijela ; tam – tamo ; bu otprhnula – će otprhnuti ; jena – jedna ; korakov – koraka ; zmržnjenih – smrznutih ; krakov – krakova ; svetlost – svjetlost ; se razleva – se razljeva ; sonca – sunca : svetli – svjetli ; vu sred – usred ; sončanoga – sunčanog ; dneva – dana ; svetom – svijetom ; sakim letom – svakom godinom ; se – vekši – sve veći
(Mirna Weber, lipanj 2013.)