Ivek si je kalinu za vuho zateknul,

Plasta sam razgrnul, zrele hruške zvadil.

Kajkavske je knjige zdrmal i pomeknul,

Zavičajno slovo v najvekšu zasadil.

.

Pisal je o pesu, miceku i ftiču,

Kači skriti v travi, jelenu i kmici,

O tmurnom obloku i o Domjaniću,

Rabarbari, sreči, odhičeni pizzi.

.

Jedan Kafkin rogač ni mu išel z glave,

Za zgruđvanim mlekom ni se v kmici plakal.

Posla se je hapil, zasukal rukave:

Vu male flašičke črninu pretakal.

.

Velemešter reči vu verse je slagal,

Jalni su ga zato brojili v čudake,

Jezik je kak dete z rokama podragal,

Čuval ga za zutra i za vučenjake.

.

Sami su ve bregi zelinski zeleni,

Črečan zavičajni z pedeset tri hiže.

Čovek je odišel, vredni i pošteni,

Na zadnje spravišče kaj se k nebu zdiže.

.

Z rafunga je opal, al’ je zvezdu vlovil,

Kajkavcima vruču pogaču podelil.

I tak je polefko vu Večnost zaplovil,

Vu kajkavskoj lištri vse štorge zacelil!

.

Vre spije, dok dijak nove cajte slovka;

Ostala je za njim Knjiga-zvezdolovka!

.

29. travnja 2025.

.

Božica Jelušić i Aleksandar Horvat